Namizədlərin efir vaxtları müəyyən edilib

Mərkəzi Seçki Komissiyası (MSK) bazar ertəsi keçirdiyi növbəti iclasında prezidentliyə namizədlərin pulsuz efir vaxtı ilə bağlı püşkatma keçirib.

Püşkatmanın nəticəsinə görə, 1-ci nömrə öz təşəbbüsü ilə namizədliyini irəli sürən Zahid Oruca, 2-ci nömrə “Yeni Azərbaycan” partiyasının sədri İlham Əliyevə, 3-cü nömrə “Ümid” partiyasının sədri İqbal Ağazadəyə, 4-cü nömtə “Ədalət” partiyasının sədri İlyas İsmayılova, 5-ci nömrə “Müasir Müsavat” partiyasının sədri Hafiz Hacıyevə, 6-cı nömrə “Milli Dirçəliş Hərəkatı” partiyasının sədri Fərəc Quliyevə, 7-ci nömrə Azərbaycan Demokrat partiyasının sədri Sərdar Məmmədova (Cəlaloğlu), 8-ci nömrə Azərbaycan Sosial Demokrat Partiyasının sədri Araz Əlizadəyə, 9-cu nömrə Bütöv Azərbaycan Xalq Cəbhəsi Partiyasının sədri Qüdrət Həsənquliyevə, 10-cu nömrə isə Milli Şuranın namizədi Cəmil Həsənliyə düşüb.

MSK sədri Məzahir Pənahov namizədlər arasında debatların həftənin cüt günləri televiziyada, tək günləri isə ictimai radioda hər dəfə 1 saat olmaqla təşkil olunacağını bildirib. 

İctimai teleradioda ödənişsiz təşviqat sentyabrın 16-dan, yəni səsverməyə 23 gün qalmış başlayır. Televiziyada namizədlərin çıxışı saat 19.00-dan, radioda isə 21.00-dan canlı yayımlanır. Seçki Məcəlləsinin tələblərinə əsasən, efir vaxtı bütün namizədlər arasında tam bərabər bölünüb.

M.Pənahov namizədlərə və onların səlahiyyətli nümayəndələrinə çıxışlar zamanı efir imkanlarından sui-istifadə hallarına yol verməmək, konstruktiv siyasi debatlara üstünlük vermək, bir-birinin və başqalarının şəxsiyyətini alçaldan çıxışlar etməmək, aparıcının sözlərinə əməl etmək çağırışı edib. 

Seçkiqabağı təşviqat kampaniyasına sentyabrın 16-da start verilir.

Prezidnetliyə namizədliyinin təsdiq olunması üçün 22 nəfər sənədlərini MSK-ya təqdim edib. Onlardan bir nəfərin namizədliyinin təsdiq olunmasından imtina edilib, digər 21 nəfərin isə prezidentliyə namizədliyi təsdiq olunub. Bu 21 nəfərdən 10 nəfər rəsmi namizəd olaraq qeydə alınıblar. MSK prezident seçkilərinin oktyabrın 9-da keçirilməsi barədə qərar qəbul edib. 

Sonuncu prezident seçkiləri 2008-ci il oktyabrın 15-də keçirilib. Azərbaycanda hər beş ildən bir prezident seçkiləri keçirilir. -16D-