NATO Azərbaycanı strateji tərəfdaş kimi görür

NATO-nun Varşava sammiti Alyansın gücünü və onun tərəfdaşlarla əlaqələri inkişaf etdirməyə sadiqliyini nümayiş etdirib. Bu barədə Rumıniyanın Bakıdakı səfiri Daniel Kristian Çiobanu NATO sammitinin yekunlarına həsr edilmiş tədbirdə bildirib.

NATO əlaqələndiricisi kimi Rumıniyanın Azərbaycandakı səfirliyi elmi dairələrin, vətəndaş cəmiyyətinin, habelə Şimali Atlantika Alyansının üzvü və tərəfdaşı olan ölkələrin səfirliklərinin nümayəndələrinin iştirakı ilə tədbir təşkil edib.

Rumıniya səfiri sammitin yekunlarını “uğurlu” adlandırıb. O, sammitin kommünikesində NATO-nun xarici siyasət və təhlükəsizlik məsələlərində tərəfdaşlarının müstəqil və suveren seçimini dəstəkləyəcəyi vurğulanır.

Alyansın Azərbaycanla münasibətlərinə toxunan Çiobanu qeyd edib ki, NATO bu əlaqələrə strateji əhəmiyyət verir, Azərbaycanı Alyansın etibarlı tərəfdaşı kimi görür.

O xatırladıb ki, NATO üzvləri Azərbaycanın ərazi bütövlüyünü və müstəqilliyini dəstəkləyir. Öz növbəsində, Rumıniya fəal şəkildə Bakının NATO ilə əlaqələrinin dərinləşdirilməsinə şərait yaradır.

Görüşdə Azərbaycanın NATO ilə qarşılıqlı münasibətlərinin perspektivləri, alyansa yeni üzvlərin qəbul edilməsi, təşkilatın Avropa qitəsində təhlükəsizliyin təmin edilməsində rolu haqqında fikir mübadiləsi aparılıb. -06D-