Naxçıvan raketləri Ermənistanda istənilən hədəfi məhv edər

Bakı/16.05.18/Turan: Naxçıvanda yerləşdirilən uzaq məsafəli raketlər düşmənin istənilən hərbi hədəfini məhv edə bilər. Bu barədə bu gün İlham Əliyev Naxçıvan ictimaiyyətinin nümayəndələri qarşısında çıxış edərkən bildirib.

Əliyev qeyd edib ki, Naxçıvanın təhlükəsizlik məsələləri ilə bağlı çox böyük iş görülüb.

"Naxçıvanın hərbi potensialının gücləndirilməsi üzrə böyük iş görülür. Azərbaycan SQ ən müasir silah və texnika ilə təchiz edilib. Müasir texnikanın, demək olar ki, bütün növləri və ya əksər növləri Naxçıvana göndərilir", deyə dövlət başçısı bildirib.

Daha sonra Əliyev qeyd edib ki, Naxçıvan ordusu düşmənin istənilən təxribatının qarşısını ala və uğurlu əks hücum əməliyyatı həyata keçirə bilər.

"Naxçıvanda yerləşdirilən uzaq məsafəli raketlər düşmənin istənilən hərbi hədəfini məhv edə bilər", deyə o sonda bildirib.

Qeyd edək ki, Azərbaycan SQ-nin silahları ardında müxtəlif növ raketlər, o cümlədən "Toçka-U", "Smerç" və bu yaxınlarda Belarusdan alınmış "Polonez" raketləri var. "Polonez"in uçuş məsafəsi 200 km təşkil edir. Naxçıvan sərhədindən Ermənistan paytaxtına qədər məsafə 72 km-dir. -02D-