Ned Praysın son şəxsi brifinqi

Vaşinqton/14.03.23/Turan: Ötən həftə ABŞ dövlət katibi Entoni Blinken gözlənilmədən Dövlət Departamentinin brifinq zalına gedərək istefa vermiş mətbuat katibi Ned Praysa gündəlik brifinqlərin təşkilindəki xidmətlərinə görə təşəkkür edib.

“Son iki ildə mən ən yaxşı köməkçi, ən yaxşı məsləhətçi və ya ən yaxşı dost haqqında xəyal belə edə bilməzdim", -  Blinken Prays haqqında deyib.

Bazar ertəsi Prays mətbuat üçün son brifinqini keçirib. "Birgə işə görə  həmkarlarıma və  hər gün çətin və lazımlı suallar verən jurnalistlərə təşəkkür edirəm. Belə dəstəyə görə həmkarlarıma minnətdaram", - o deyib.

Prays mətbuat nümayəndələrinə müraciət edərək fəal işə və qarşılıqlı anlaşmaya görə onlara təşəkkür edib. "Biz başa düşürük ki, sonda eyni məqsədə xidmət edirik: bütün dünyada auditoriyaya vaxtında və dəqiq məlumat çatdırmaq".

Jurnalistlər, o cümlədən Turan-ın Vaşinqton müxbiri Aleks Raufoğlu Dövlət Departamentinin gündəlik brifinqlərinin bərpasının vacibliyini qeyd ediblər.

“Bu gündəlik brifinqlərin benefisiarlarından biri kimi təkcə həmkarlarım adından yox, həm də öz auditoriyam adından deyilənlərin hamısının altından imza atıram", - Raufoğlu  deyib.

2021-ci ilin yanvarından Dövlət Departamentinin baş nümayəndəsi postunu tutan Prays tezliklə Blinkenin məsləhətçisi kimi çalışaraq öz üzərinə yeni  rol götürəcək. Dövlət Departamenti hələlik mətbuat katibi postunu tutacaq şəxsi elan etməyib və mətbuat katibinin müavini Vedant Patel müvəqqəti olaraq mətbuat katibi vəzifəsini icra edəcək. 0