Neytral Türkmənistan gözlənilmədən hərbi fəallıq göstərdi

Türkmənistan prezidentinin sərəncamı ilə gözlənilmədən ölkədə silahlı qüvvələrin və ölkənin digər güc qurumlarının döyüş hazırlığının yoxlanılmasına başlanılıb.

Türkmənistan prezidentinin mətbuat xidmətnin rəsmi məlumatına görə, operativ olaraq təlimləri idarə  edən  hərbi qərargah yaradılıb, Quru Qoşunlarının, Hərbi Hava Qüvvələrinin, HHM və HDQ-nin hərbi hissələri isə döyüş hazırlığı vəziyyətinə gətirilib.

“Bu zaman təyyarələr, helikopterlər, pilotsuz uçan aparatlar, döyüş gəmiləri və təminat gəmiləri cəlb edilib. Uzun müddətdir mühafizə edilən raket-artilleriya silahları, hərbi və xüsusi texnika yenidən işə salınıb və komandanlığın qarşıya qoyduğu döyüş tapşırıqlarının həllinə cəlb edilib. Əmrə əsasən, milli ordunun hərbi hissələri hərbi-taktiki təlimlər keçirmək üçün müəyyən edilmiş təlim mərkəzlərinə yürüş edəcəklər. Bu təlimlərin əsas məqsədi bütün növ qoşunların birgə fəaliyyətini məşq etməkdir”, deyə məlumatda qeyd edilir.

Eyni zamanda, ölkə HDD martın 26-da Xəzərdə təlimlərə başlayıb. HDD gəmiləri şərti düşmənin dəniz və hava qüvvələrinə təlim atışları həyata keçirəcəklər. Şərti düşmənin sahil zonasına yerləşmiş desantçılarının məhv edilməsi üçün dəniz piyadalarının desant kimi çıxarılması həyata keçirilib, deyə məlumatda bildirilir.

Qeyd edək ki, Türkmənistan ilk gündən heç bir bloka daxil deyil və neytral statusunu elan edib. Lakin son illər ölkə durmadan silahlanır, müasir silahlar və müxtəlif sistemlər alır.

Türkmənistan prezidenti Xəzəryanı ölkələrdən Xəzər hövzəsindən Rusiya gəmilərinin Suriya ərazisinə raket buraxmasından narahatlıq bildirən yeganə prezident oldu.

Raketlər İranın Azərbaycan ərazisinə bilavasitə yaxın olan Enzeli şəhəri yaxınlığından atılırdı. Lakin Bakı özünü elə apardı ki, sanki burnunun dibindən atılan onlarla orta mənzilli raketi görməyib. -02D-