NİDA-çıların məhkəməsində Nelson Mandela anılıb

 Dekabrın 10-da  Bakı Ağır Cinayətlər Məhkəməsində  hakim Cavid Hüseynovun sədrliyi ilə“Nida” Vətəndaş Hərəkatının üzvləri və Azad Gənclik Hərəkatının üzvünün cinayət işi üzrə məhkəmə baxışı davam edib.  

Bugünki iclas vəkillərin gəlməməsi səbəbindən təxminən 40 dəqiqə təxirə salınıb.

Vəkillər gələndən sonra proses davam edib.

NİDA üzvü Rəşadət Axundov məhkəməyə müraciət edərək İnsan Haqları Günü ilə əlaqədar bü günlərdə vəfat etmiş Nelson Mandelanın xatirəsinin birdəqiqəlik sükutla yad olunmasını xahiş edib.

Daha sonra İlkin Rüstəmzadə şifahi vəsatət vermək istədiyini deyib. Hakim isə vəsatətlərin sonra veriləcəyini deyib.

Prosesdə təqsirləndirilən Bəxtiyar Quliyevin ibtidai istintaqa verdiyi ifadə elan olunub. Bu onunla əsaslandırılıb ki, təqsirləndirilənlər  ifadə verməkdən imtina ediblər. İfadə B. Quliyevin daha  çox Harleme Shake videoçarxının kimə məxsus olduğu və necə çəkilməsi istiqamətində müstəntiqin verdiyi suallar əsasında olub.

B.Quliyev bildirib ki, ifadəsində qeyd edib ki, video Senan adli şəxsə məxsusdur. Youtube-da yerləşdirmə və montaj isə jurnalist Mehman Hüseynova məxsusdur. Məqsəd Azərbaycanda diqqəti cəlb etmək üçün  maraqlı nəsə etmək idi. İ.Rüstəmzadə isə  klipi çəkənin yanında olub. Özü videoçarxa düşməyib.

O həmçinin evində tapılan narkotik maddənin və “Molotov kokteyli”nin ona məxsus olmadığını, onlardan istifadə etmədiyini bildirib. 

B.Quliyev elan olunan ittiham üzrə özünü təqsirli bilmədiyini də qeyd edib.

Proses dekabrın 12-də davam edəcək.

Qeyd edək ki, NİDAçılar martın 10-da Bakıda Fəvvarələr Meydanında kütləvi iğtişaşlar hazırlamaqda ittiham olunurlar. Bundan əlavə, onlara qarşı qanunsuz silah və narkotik maddə saxlamaq, xuliqanlıq ittihamları irəli sürülüb.-16C-