NİDA fəalını siyasi motivlərlə işdən çıxarırlar

NİDA hərəkatının İdarə Heyətinin üzvü Aygün Pəncəliyevanın International School-dan (Bakıdakı Amerika Məktəbi, Azərbaycan Təhsil Nazirliyinə aidiyyatı yoxdur) işdən çıxarılması tələb olunub. Üç ildir ki, A.Pəncəliyeva bu təhsil müəssisəsində fransız dili dərsi deyir.

  Bu barədə A.Pəncəliyeva öz Facebook səhifəsində yazıb. Onun sözlərinə görə, əks halda “yuxarıdan” məktəbin bağlanacağı ilə hədələyiblər.

  “Mən nə Amerika səfirlyiindən, nə digər səfirliklərdən, nə də beynəlxalq təşkilatlardan heç nə gözləmirəm. Bu, belə münasibətlə bağlı ilk hal deyil. Onların ölkədə olub- olmasının heç bir fərqi yoxdur. Əgər bizim hökumət özgə cür düşünənlərə hörmətlə yanaşmırsa, başqalarından nə gözləmək olar.

Bəziləri elə bilir ki, mən işsiz qalacam və acından öləcəm. Mən öz biliyimə, təcrübəmə, məsuliyyətimə 100 faiz əminəm. Yeganə narahatlığım odur ki, öz şagirdlərimə dərs deyə bilməyəcəm”, - o yazır.

  Xatırladaq ki, bundan əvvəl NİDA-nın 7 fəalı həbs olunub. Onlar qanunsuz partlayıcı maddə və narkotik maddə saxlamaqda ittiham olunurlar.

 Amnesty International onları “vicdan məhbusu”  sayır.—16D06--