NİDA fəallarına qarşı ittihamlar absurddur

NİDA hərəkatının 7 fəalına və “Azad gənclik” təşkilatının üzvünə qarşı ittihamlar absurddur və siyasi motivlidir. Sübutlar qanun pozuntusu ilə toplanıb, hətta onların bəzisi saxtalaşdırılıb. Odur ki, cinayət işi dayandırılmalı, gənclər azadlığa buraxılmalıdır. Noyabrın 5-də Bakı Ağır Cinayətlər Məhkəməsində keçirilən hazırlıq iclasında vəkillərin ümumi rəyi belə olub.

İttihamnaməyə görə, 2013-cü ilin fevralında NİDA təşkilatının üzvləri Rəşad Həsənov, Bəxtiyar  Quliyev, Üzeyir Məmmədli, Rəşadət Axundov, Zaur Qurbanlı, Şahin Novruzlu, Məmməd Əzizov, eləcə də İlkin Rüstəmzadə və digərləri ictimai-siyasi sabitliyi pozmaq, dövlət hakimiyyəti və idarəçilik orqanlarının fəaliyyətini iflic edərək ictimai asayişin kütləvi pozuntularına yol vermək məqsədi ilə 10 mart 2013-cü il tarixində Bakıda paytaxt sakinləri və qonaqların yalnız istirahəti üçün nəzərdə tutulan, çoxsaylı tarixi-memarlıq tikililərinin, ictimai-iaşə, ticarət, xidmət və əyləncə obyektlərinin mövcud olduğu Fəvvarələr meydanında qanunsuz aksiya keçirilməsi və həmin aksiyada xaos və çaşqınlıq yaratmaq, ictimai qaydanı qorumaq üzrə xidməti vəzifələrini yerinə yetirən hakimiyyət nümayəndələri olan polis əməkdaşlarını qorxudub güclərini zəiflətmək, destruktiv qüvvələrin diqqətini cəlb etməklə siyasi və maddi dəstək əldə etmək, gəncləri qanunsuz aksiyalarda iştiraka həvəsləndirmək üçün tərkibi tezalışan maye yanacaq benzindən və tüstüsüz barıtdan ibarət “Molotov kokteyli”, “tüstü şaşkaları”, yəni partlayıcı qurğular tətbiq etməklə yanğınların törədilməsi, əmlakın məhv edilməsi ilə müşayiət olunan kütləvi iğtişaşlar təşkil etmək barədə razılığa gəliblər.

Əvvəlcədən hazırlanmış plan və vəzifə bölgüsünə əsasən NİDA-nın İdarə Heyətinin üzvləri R.Həsənov, Ü.Məmmədli, R.Axundov, Z.Qurbanlı və digərlərinin tapşırıq və rəhbərliyi ilə müəyyən destruktiv qüvvələrin kütləvi iğtişaşlara cəlb olunması nəzərdə tutulan şəxslərin maliyyələşdirilməsi üçün ayrılan 94.100 manat və 589,35 manata bərabər 750 ABŞ dolları məbləğində pul vəsaitlərinin Ş. Novruzlunun yaşadığı ünvanda saxlanması, İ.Rüstəmzadənin 10.03.2013-cü il tarixində “Əsgər ölümlərinə son” adı altında Bakıda kütləvi aksiyanın keçirilməsinə çağırışları internet sosial şəbəkəsində yerləşdirməsindən sonra B.Quliyev, Ş.Novruzlu və M.Əzizov İnternet informasiya ehtiyatlarında “Molotov kokteyl”inin hazırlanması qaydalarına dair zəruri məlumatları toplayıb, dəfələrlə görüşərək əldə etdikləri məlumatları bölüşüb partlayıcı qurğuların hazırlanması barədə müzakirələr aparıb, həmçinin iğtişaşlara daha çox sayda insanların cəlb olunması üçün “Facebook” sosial şəbəkəsində qanunsuz aksiyaya çağırış müraciətlərini paylaşaraq əhali arasında yayılması üçün vərəqələr tərtib edib, mütəşəkkil dəstə tərkibində insanların həyat və sağlamlığı üçün təhlükə yaradan, partlayış və yanğın törədə bilən əldəqayırma üsulla hazırlanmış, istifadəyə yararlı, tez alışan maye yanacaq benzindən, mineral yağlardan ibarət, mayenin dağılmaması və uçmaması üçün pambıq parçadan ağzına həm də fitil rolunu oynayan tıxac vurulmuş 0,5 litrlik şüşə qablarda 20 ədəd “Molotov kokteyli” qarışığı kimi istifadəsi nəzərdə tutulan yandırıcı (alışdırıcı) vasitələri, 0,5 litrlik şüşə qabların üzərinə skotç vasitəsilə içinə “Sokol" tipli tüstüsüz barıt olan nitrosellüloza doldurulmuş 10 ml-lik şprislər bərkidilməklə hazırlanmış 2 ədəd partlayıcı qurğunu, kütləvi iğtişaşın iştirakçılarının fəallıqlarını artırmaq məqsədilə onlar arasında yaymaq üçün istintaqa məlum olmayan mənbədən satış məqsədi olmadan B. Quliyev 255,40 qram həşiş qatranından və 15,48 qram qurudulmuş marixuanadan, Ş. Novruzlu 252,27 qram həşiş qatranından, M. Əzizov isə 174,54 qram qurudulmuş marixuanadan ibarət şəxsi istehlak miqdarından artıq narkotik vasitəni qanunsuz olaraq əldə edib yaşadıqları ünvanlarda 10 mart 2013-cu il tarixinə Bakı şəhərində təşkil edilən kütləvi iğtişaş üçün saxlayıb, lakin 7 mart 2013-cü il tarixdə həmin ünvanlarda hüquq-mühafizə orqanlarının əməkdaşları tərəfindən aşkar edilən yuxarıda qeyd olunan cinayətin vasitə və alətləri götürülüb.

Həmçinin B.Quliyev və İ.Rüstəmzadə 1 mart 2013-cü il tarixində Bakıda bir qrup şəxslə dənizkənarı Milli Parkın ərazisində gündüz vaxtı, saat 15:00 radələrində ictimai qaydanı kobud surətdə pozaraq bədii-estetik dəyərlərə malik memarlıq abidəsi olan yaşlı kişinin bürünc materialdan hazırlanmış tökmə fiqurunun arxa və baş hissələrində ictimai mənəviyyatın pozulmasında ifadə olunan davamlı təkrarlanan əxlaqa zidd və qurşaqdan yuxarı üst geyim paltarlarını soyunduqdan sonra isə çılpaq vəziyyətdə qərəzli xaotik əl-qol hərəkətləri ilə bir daha nümayiş etdirib, onun qeyd olunan hərəkətlərinin, yəni ictimai qaydanın pozulmasının qarşısını alan hakimiyyət nümayəndələri olan Bulvar İdarəsinin mühafizəçilərinə və polis əməkdaşlarına, eləcə də digər şəxslərin qanuni tələblərinə nümayişkaranə surətdə tabe olmayıb müstəsna həyasızlıqla öz hərəkətlərini dayandırmaması ilə müqavimət göstərib, yaşadığı cəmiyyətin etik normalarına zidd hərəkətlərini lentə almaqla 6,16 meqabit həcmində süjet hazırlayıb geniş auditoriya kimi İnternet sosial şəbəkəsində qeyd olunan video süjetin kütləvi surətdə izlənilməsi üçün 1 mart 2013-cü il tarixdə ‘‘Harlem Shake-Park Bulvar” adı ilə “Youtube.com” saytında yerləşdirilib kütləvi surətdə yayımlamaqla cəmiyyətə açıqca hörmətsizlik ifadə edən xuliqanlıq ediblər.

Hazırlıq iclası zamanı hakim Cavid Hüseynov istintaq tərəfindən müttəhimlərə irəli sürülən ittihamları elan edib ki, bunlar da ilkin ittihamlardan fərqlənib. Beləliklə, R.Həsənov, R.Axundov, Z.Qurbanlı və Ü.Məmmədli  CM-in 28, 220.1 (cinayətə- kütləvi iğtişaşların təşkilinə hazırlıq) və  228.3 (partlayıcı maddələrin qanunsuz əldə edilməsi, ötürülməsi, satışı, saxlanması, daşınması və gəzdirilməsi) maddələri ilə ittiham olunublar.

M.Əzizov və Ş.Novruzlu 28, 220.1, 228.3 və 234.1 (şəxsi istifadə üçün lazım olan miqdardan artıq narkotik vasitənin satış məqsədi olmadan qanunsuz əldə  edilməsi və ya saxlanması) maddə ilə təqsirli bilinib.

B.Quliyev 28, 220.1, 228.3, 234.1, 221.2.1 (bir qrup şəxs tərəfindən xuliqanlıq törədilməsi) və 221.2.2-ci maddələrlə  (ictimai asayişin qorunması üzrə vəzifəsini yerinə yetirən şəxslə bağlı xuliqanlığın törədilməsi) təqsirli bilinir.

İ.Rüstəmzadə 28, 220.1, 228.3, 221.2.1 i 221.2.2-ci  maddələrlə ittiham olunur. 

Gənclərin günahı sübuta yetirilərsə onları 12 ilədək azadlıqdan məhrum olunma cəzası gözləyir. 

İclas zamanı vəkillər cinayət işinin dayandırılması və ya ev həbsi ilə əvəzlənməsi barədə vəsatət qaldırıblar.

Vəkil Rəşid Hacılı bir sıra sübutların cinayət materiallarından çıxarılması ilə bağlı ümumi vəsatət qaldırıb. Bundan sonra gənclərin təqib olunması üçün əsas olmayacaq. 

R.Hacılı Turan-ın müxbiri ilə söhbətində bildirib ki, hələ fevralın ortalarında MTN “operativ informasiya” əsasında Quliyev, Novruzlu və Əzizovun mənzillərinə baxışla bağlı məhkəmədən sanksiya alıb. Odur ki, martın 7-də MTN-in nümayəndələrinin axtarış üçün sanksiyası olmayıb. Axtarış yalnız  cinayət işi qaldırıldıqdan sonra aparıla bilər. 

Axtarış aparılarkən şübhəlilərin öz vəkillərini  dəvət etmək imkanları olmalıdır. Bütün bu qanunsuz hərəkətlərin nəticəsində mənzillərdə “Molotov kokteyli” və narkotik maddə “aşkar edilib”. Müttəhimlərə qarşı bütün ittihamlar məhz bunun üzərində qurulub”, - R.Hacılı bildirib.   

Bundan əlavə, istintaq “Molotov kokteyli”nin götürüldüyünü bildirib. Lakin bu maye yandırıcı qatışıqdır, partlayıcı maddə deyil və  228-ci maddə üzrə cinayət işi qaldırmaq düzgün deyil, vəkil Əsabəli Mustafayev qeyd edib. Məhz bundan sonra istintaq “sübutlar” sırasında içində barıt olan iki butılka əlavə edib. Lakin bu butılkaları televiziyada göstəriblər, fotoları qəzetlərdə dərc edilib, orada barıt olan şprislər olmayıb.

Vəkil R.Hacılı diqqəti ona yönəldib ki, istintaqın məlumatına görə, müttəhimlər fevralın 28-də razılığa gəliblər ki, martın 10-da əsgər ölümlərinə etiraz aksiyası keçirsinlər. Buna əsgər Seymur Allahverdiyevin ölümü səbəb olub. Lakin bu barədə məlumat martın 1-də yayılıb. Belə olan halda necə ola bilər ki, müttəhimlər fevralın 28-də etiraz aksiyası təyin etsinlər və iğtişaşlar planlaşdırsınlar, R.Hacılı qeyd edib.  

Bundan əlavə, 10 mart aksiyası baş tutub və heç bir kütləvi iğtişaş, heç buna cəhd olmayıb.  

Xuliqanlıq ittihamına gəlincə, fleş-mob şəklində Harlem Shake rəqsi bütün dünyada var və cinayət hesab oluna bilməz.

Məhkəmənin vəsatətlər üzrə qərarı noyabrın 14-də saat 15:30-da növbəti məhkəmə iclasında elan olunacaq.

Qeyd edək ki, müttəhimləri dəstəkləmək üçün məhkəməyə 200-ə yaxın gənc gəlib.

Milli Şuradan prezidentliyə keçmiş namizəd Cəmil Həsənli də ictimai müdafiəçi kimi məhkəmədə iştirak edib.

O, jurnalistlərlə söhbətində günahsız insanlara qarşı keçirilən məhkəməni tənqid edib.

Prosesin mümkün yekunlarının qiymətləndirilməsi ilə bağlı xahişin cavabında C.Həsənli deyib ki, “hakimiyyət bu işi beynəlxalq təşkilatların alver predmetinə çevirəcək”.

“Adətən dövlətlər bu cür məsələlərdə alver kimi xarici vətəndaşdan istifadə edirlər, bizim hakimiyyət isə öz vətəndaşlarının taleyi ilə oynayır”, - C.Həsənli vurğulayıb.

Amnesty İnternational beynəlxalq hüquq-müdafiə təşkilatı həbs olunan gəncləri vicdan məhbusları adlandırıb.-06C-