Körpü və yollara təhsil, səhiyyə və elmə birlikdə ayrılandan 2,5 dəfə çox vəsait yönəldilib

Milli Məclisin üzvləri ölkənin dövlət büdcəsinin sosial-investisiya yönlü olmasından (66%) məmnundurlar. 

2014-cü ilin dövlət büdcəsinin müzakirəsi ilə bağlı 6 komitənin birgə iclasında elm və təhsil üzrə parlament komitəsinin sədri Şəmsəddin Hacıyev təhsil, mədəniyyət, səhiyyə, incəsənət və elmə büdcə xərclərinin artdığını qeyd edib. Onun sözlərinə görə, bu illə müqayisədə 2014-cü ildə təhsil xərcləri 1 mlrd 653 mln 445,19 min manat (+12%), səhiyyəyə 725 mln 586,17 min (+14%), elmə 146 mln 815,9 min (+15%) manat ayrılıb.

Deputat unudub ki, investisiya layihələrinə  təhsil, səhiyyə və elmə birlikdə ayrılandan çox - 6 mlrd 281 mln 954,73 min manat vəsait yönəldilib 

Bu nəzarətsiz və millət üçün perspektivsiz sahə büdcə vəsaitlərinin 31,3%-i “yeyəcək”. Hər il hökumət körpü və yol tikintisinə milyardlar ayırır, sonradan onlar dəfələrlə təmir edilir. 

Büdcədən sosial ehtiyaclara 2 mlrd 72 mln  233,88 min manat ayrılacaq. Bunun 1,14 mlrd-ı Neft Fondundan transfertlərdir. 

Əsas növlərə daxil olmayan xidmətlərə 2 mlrd 670 mln 806,78 min manat ayrılır. Bunun 538 mln-u avtomobil yollarına xidmət üçün nəzərdə tutulub. --17D—