İsmayıllı hadisələri üzrə proses yararsız zalda keçirilir

Əgər İsmayıllı hadisələri üzrə müttəhimlərin məhkəməsi geniş məkanda keçirilməsə REAI hərəkatının rəhbəri İlqar Məmmədovun vəkilləri prosesdə iştirakdan imtina edə bilər. Bu barədə Turan-a vəkil Xalid Bağırov bildirib. Onun sözlərinə görə, Şəki Ağır Cinayətlər üzrə Məhkəmənin kiçik zalında bu cür miqyaslı iş üzrə proses keçirmək mümkün deyil. 

“Dar barmaqlıq arxasında 18 nəfər oturur. Hakim onların üzünü görə bilmir ki, şəxsiyyətlərini müəyyən etsin. Müttəhimlər hakimi görmək üçün barmaqlıqdan boylanmalıdır”, - o qeyd edib.

Noyabrın 4-5-də keçirilən hazırlıq iclasında müttəhimlər demək olar ki, dar barmaqlıq arxasında boğulurdular. “Odur ki, biz bu dəhşətə son qoyulması üçün vəsatət qaldırmışıq”, - o bildirib. 

Öz növbəsində REAL hərəkatının icraçı katibi Natiq Cəfərli deyib ki, İ.Məmmədov və T.Yaqubluya qarşı ittihamlar siyasidir və onların hüquqları uğrunda mübarizə siyasi müstəvidə aparılacaq.

Real İ.Məmmədovun hüquqlarının müdafiəsi və prosesin açıqlığının təminatı ilə bağlı beynəlxalq təşkilatlarla işi davam etdirir. Noyabrın 18-də Şəkidə keçiriləcək dinləmələrə qərb dövlətlərinin səfirliklərinin və beynəlxalq təşkilatların nümayəndələri gedəcək.

Əgər onlara prosesi izləməyə icazə verilməsə və ya jurnalistlər, hüquq müdafiəçiləri buraxılmasa bu, böyük rezonans doğuracaq, çünki İ.Məmmədovun və T.Yaqublunun azadlığa buraxılması ilə bağlı Avropa Parlamentinin qətnaməsi var.

Xatırladaq ki, yanvarın 23-də İsmayıllıda “Çıraq” hotelinin inzibatçısı Emil Şəmdinovun və onun tanışı Elməddin Məmmədovun sərxoş vəziyyətdə özgənin əmlakının zədələnməsi ilə müşayiət olunan qərəzli xuliqanlıq hərəkətləri etmələri və bununla əlaqədar hadisə yerinə toplaşmış bir qrup şəxs tərəfindən “Çıraq” hotelinin və müxtəlif markalı avtomobillərin yandırılması ilə nəticələnən kütləvi münaqişə, daha sonra kütləvi etirazlar baş verib.    

Etirazlar yanvarın 24-də yatırılıb. 18 nəfər həbs edilib. Həbs olunanların arasında etirazlar yatırıldıqdan sonra İsmayıllıya getmiş müxalif REAL hərəkatının lideri İlqar Məmmədov və Müsavat Partiyası başqanının müavini Tofiq Yaqublu da var. 

Tofiq Yaqublu, İlqar Məmmədov, həmçinin İsmayıllı rayon sakinləri Cinayət Məcəlləsinin 233 (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315.2-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə cinayət işi qaldırılıb və barələrində həbs qətiimkan tədbiri seçilib. -06B-