NİDA: Həbslər bizi qorxutmur!

NİDA vətəndaş hərəkatı öz üzvlərinin qondarma ittihamlarla həbs olunmasından ciddi narahatdır.  Bu barədə  NİDA-nın bəyanatında deyilir. Hərəkat həbs bu həbsləri qanunsuz sayır.

NİDA baş verənləri hakimiyyətin təşkilata qarşı repressiyası və təzyiq vasitəsi kimi qiymətləndirir, NİDA üzvlərinin həbsini onların aktiv ictimai fəaliyyəti ilə əlaqələndirir. Eyni zamanda şərlənərək qanunsuz həbs olunan üzvlərinin dərhal azadlığa buraxılmasını tələb edir.

“Bəyan edirik ki, NİDA vətəndaş hərəkatı bu həbslərdən qorxmur, geri çəkilmir. Əksinə, biz mübarizəmizi daha böyük əzmlə davam etdirəcəyik”, - bəyanatda vurğulanır.

Qeyd edək ki, martın 7-də NİDA-nın üç üzvü – Məmməd Əzizov, Bəxtiyar Quliyev  və Şahin Novruzlu mülki geyimli şəxslər tərəfindən saxlanılıblar. Gənc fəallara qarşı Baş Prokurorluğun Ağır Cinayətlərə dair İşlər üzrə İstintaq İdarəsində Cinayət Məcəlləsinin 234.1 (qanunsuz olaraq narkotik vasitələri əldə etmə, saxlama və ya satma) və 228.1-ci (qanunsuz olaraq silah, partlayıcı maddələr və qurğular əldə etmə, saxlama, daşıma və gəzdirmə) maddələri ilə cinayət işi başlanıb.

Martın 14-də NİDA İdarə Heyətinin üzvü Rəşad Həsənov həbs olunub. Ona qarşı CM-in 228.3-cü (yivsiz odlu ov silahı və həmin silah üçün döyüş sursatı istisna olmaqla, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə (mütəşəkkil dəstə tərəfindən törədilməklə) maddəsi ilə ittiham irəli sürülüb. İdarə Heyətinin üzvü Rəşadət Axundov və Üzeyir Məmmədliyə də yuxarıda qeyd olunan maddə üzrə ittiham irəli sürülüb. Onların barəsində 3 aylıq həbs qətimkan tədbiri seçilib. -16D-