Nigar Yaqublunun həbsi siyasi sifarişdir

 Yol qəzasına görə barəsində həbs qərarı seçilmiş gənc müsavatçı Nigar Yaqublunun vəkilləri və hüquqlarını Müdafiə Komitəsi cümə günü RATİ-də “dəyirmi masa” keçirib.

Müdafiə Komitəsinin sədri Mehriban Vəzir N.Yaqublunun barəsində həbs qərarını ictimai fəala qarşı qərəz, ədalətsizlik, əxlaq və mənəviyyata sığmayan çirkin addım adlandırıb.

“Əgər Nigar ictimai fəal olmasaydı, həbsdə olmazdı. Bu həbsin siyasi sifariş olmamasına artıq heç kəsi inandırmaq olmaz”, - N.Yaqublunun vəkili Adil İsmayılov bildirib. N.Yaqublunun barəsində istintaq zamanı həbs qəti-imkan tədbirinin seçilməsini ictimai fəal olması ilə əlaqələndirilib. 

N.Yaqublunun cəzasını məntəqə tipli cəza müəssisəsində çəkəcəyinə toxunulub. Burada cəza çəkmənin daha yüngül olması, 12 saat müddətinə məntəqəni tərk edə bilməsi halları qeyd edilib. “Azərbaycan gerçəkiliyində bu tipli yerlərdə qalmırlar, insanlar evlərində olur. Amma bunun Nigara tətbiq edilib-edilməyəcəyi bir ayrı məsələdir”,- A.İsmayılov N.Yaqubluya əlahiddə münasibətin ola bilməsini dilə gətirib. 

Digər vəkil Elton Quliyev N.Yaqublunun həbsini yol qəzasına görə Azərbaycanda ilk qadın məhbus “yeniliyi” yaranması adlandırıb. N.Yaqublunun barəsində istintaq dövründə həbs qətimkan tədbirinin seçilməsindən məhkəmənin 2 il 6  ay həbs qərarı çıxarmasına kimi bütün proses hüququn pozulması kimi dəyərləndirilib. “Bu işdə bir vərəq belə prosessual sənəd sayıla bilməz”, - E.Quliyev məhkəməni başdan-ayağa hüquqi pozmalarda ittiham edib. 

“Əvvəl gündən bilinirdi ki, bu həbs siyasi sifarişdir”, - Xalq Cəbhəsi Partiyasının sədri Əli Kərimli N.Yaqbulunun həbsinə münasibətini bildirib. Bu həbs ictimai fəallığına görə N.Yaqubluya, siyasi əqidəsinə görə atası, Müsavat Partiyasının funksioneri Tofiq Yaqubluya təzyiq kimi dəyərləndirilib. Bu həbs həm də T.Yaqubluya mənəvi işgəncə kimi xarakterizə edilib. 

Tarixçi-professor  Cəmil Həsənli isə N.Yaqublunun həbsini Prezident Administrasiyasının rəhbəri Ramiz Mehdiyevin sanksiyalaşdırdığını nəzərə çatdırıb. 

Müdafiə Komitəsi N.Yaqublunun həbsdən azad olunması üçün mübarizəni davam etdirəcəyini bildirib. -05C-