Nikol Paşinyanın Qarabağ münaqişəsi ilə bağlı mümkün güzəştlər və Rusiyanın mövqeyi haqqında fikirləri

Yerevan/20.07.18/Turan: "Qarşılıqlı güzəştlərdən danışarkən hər iki tərəfin güzəştlərə hazır olması nəzərdə tutulur. Azərbaycanın güzəştlərə hazır olmadığı göz önündədirsə, biz niyə buna hazır olub olmadığımızı müzakirə edək?". Bu barədə iyulun 20-də Yerevanda keçirilən mətbuat konfransında Ermənistanın baş naziri Nikol Paşinyan bildirib.

"Biz hansısa hökümət üzvündən "status müqabilində ərazi" prinsipinin məqbul olub olmadığını soruşarkən metodik səhvə yol veririk. Azərbaycanın qarşılıqlı güzəştlərə hazır olduğu haqqında mesaj alsaq bizim üçün güzəştlərin hansı sərhədlərinin olduğunu təkcə hökumət səviyyəsində deyil, bütün xalqla müzakirə edəcəyik.

Mən bir şeyi deyə bilərəm: Dağlıq Qarabağ məsələsinin xalqımız üçün məqbul olmayan həllini istisna edirəm. Ermənistanda belə bir qərar qəbul edə biləcək bir hakimiyyət ola bilməz", deyə Paşinyan bildirib.

Danışıqlarda Qarabağın iştirakına toxunan baş nazir deyib ki, məsələ Qarabağ sakinlərinin iştirakı olmadan həll edilə bilməz.

Eyni zamanda, o, Azərbaycan prezidenti ilə danışıqlar aparmağa hazır olduğunu və "onunla danışacaq şeyləri olduğunu" deyib.

Danışıqlar öz-özlüyündə faydalıdır, belə ki, məsələnin həlli üçün müəyyən etimad mühiti yaratmaq lazımdır. Problemin nizamlanması üçün müvafiq mühitə ehtiyac var, deyə o əlavə edib.

Bu deyilənlərdən Yerevanın dolayısıyla Qarabağın statusu müqabilində işğal edilmiş ərazilərin azad edilməsi məsələsini müzakirə etməyə hazır olduğu sezilir.

Yeni müharibə ehtimalına toxunan Paşinyan Rusiyanın Azərbaycanın bunu etməsinə imkan verməyəcəyi fikrində olduğunu bildirib.

"Rusiya böyük dövlət kimi regionumuzda müharibəyə imkan verməmək gücünə malikdir. Ermənistanın strateji müttəfiqi olan Rusiyanın öz imkanlarından istifadə etməyəcəyinə inanmaq istəmirəm. Rusiyanın müharibə başlamasına imkan verəcəyinə və Azərbaycanı çəkindirmək üçün öz vasitələrindən istifadə etməyəcəyinə inanmaq istəmirəm", deyə Paşinyan bildirib.-02D-