Nyu Meksiko Senatı Xocalı faciəsini tanıyıb

Yanvarın 29-da Amerikanın Nyu Meksiko ştatının  Senatı 35 səs lehinə (7 səs əleyhinə) olmaqla  1992-ci il fevralın 26-da Xocalı şəhərində dinc vətəndaşların kütləvi qətlə yetirilməsi faktını tanıyıb. Qərar layihəsi senator Cerald Ortiz Pino tərəfindən təqdim olunub. Senatorun təqdimatında deyilir ki, “fevralın 25-26-da erməni qüvvələri Rusiya qoşunlarının müşayiəti ilə Azərbaycanın Xocalı şəhərini işğal ediblər. Uşaqlar, qadınlar və yaşlılar da daxil olmaqla, 600-dən çox günahsız adam öldürülüb, minlərlə adam şikəst edilib, 200 mülki şəxs əsir götürülüb”.

Sənəddə qeyd olunur ki, qətlə yetirilənlərin çoxunun cəsədi tanınmaz hala salınıb ki, bu da həmin qətliamı  “ən qeyri-insani, barbar” qırğınlardan birinə  çevirir. Çoxsaylı hüquq-müdafiə təşkilatları, KİV və hökumətlər Xocalı qırğının təsvir edərək pisləyiblər. Erməni qüvvələrinin Dağlıq Qarabağı və onun ətrafındakı yeddi rayonu işğal etməkdə davam etməsini nəzərə alaraq, BMT Təhlükəsizlik Şurası və BMT Baş Assambleyası Ermənistanın  Azərbaycanın ərazilərini işğal etməsini pisləyən qətnamələr qəbul edib. Xocalı hadisələri yalnız müharibə zamanı mümkün olan dəhşətli qanlı qırğını xatırladır. Xocalı faciəsinin 21-ci ildönümü ərəfəsində Nyu Meksiko ştatının Senatı 1992-ci il fevralın 26-da qətlə yetirilmiş 600 çox günahsız qurbanın xatirəsini yad edir”, -qətnamədə deyilir. Sənədin surəti Konqresə və Azərbaycanın ABŞ-dakı səfirliyinə təqdim olunub.-25D-