OCCRP: Bəxtiyar Hacıyevə qarşı kompromatın arxasında Azərbaycan hakimiyyəti dayanır

Bakı/11.04.23/Turan: Azərbaycanda dissidentləri, hakimiyyət tənqidçilərini susdurmaq üçün intim foto və videolardan istifadə praktikası davam edir. Bu barədə bir çox ölkədən araşdırmaçı jurnalistləri birləşdirən Mütəşəkkil Cinayətkarlıq və Korrupsiyanın Araşdırılması üzrə Beynəlxalq Jurnalist Layihəsinin (OCCRP) materialında deyilir.

Fevralın ortalarında tanınmış fəal Bəxtiyar Hacıyev öz həbsinə etiraz olaraq aclıq  edib. Növbəti həftələrdə Telegram-da onu ifşa edən fotoşəkillərin olduğu kanallar görünməyə başlayıb. Belə ki, onun yazışmaları, audioyazıları da daxil olmaqla, şəxsi telefonundan oğurlanan fotoşəkillər şəbəkəyə düşüb.

Bu, həm fəalın özünü, həm də onun ünsiyyətdə olduğu qadınları gözdən salmaq üçün edilib.

Eyni zamanda, qadınların adları, ev ünvanları və ya əlaqə məlumatları şəbəkədə açıqlanıb.

"Bir sıra beynəlxalq hüquq- müdafiə qrupları Azərbaycan Daxili İşlər Nazirliyinin öz vətəndaşlarına qarşı haker kampaniyalarını koordinasiya etməsinə dair səhih sübutlara malikdir. Azərbaycan həmçinin “Pegasus” casus proqram təminatının əsas istifadəçisi kimi tanınıb.

OCCRP müəyyən edib ki, Azərbaycan hökuməti “Pegasus” casus proqramı vasitəsilə 40- dan çox fəal, jurnalist və onların ailə üzvlərini, o cümlədən Bəxtiyar Hacıyevi izləyib", - OCCRP-nin hesabatında deyilir. 0