Ombudsman Aparatı İqtisadiyyat Nazirliyindən informasiya sorğusuna cavab verməyi xahiş edir

Bakı/04.03.22/Turan: Ombudsman Aparatı iqtisadiyyat nazirinin birinci müavini Elnur Əliyevə məktub göndərib. Məktubda AR Konstitusiya Qanununun "İnsan hüquqları üzrə müvəkkil haqqında" 1.3-cü maddəsinə istinadla Turan İnformasiya Agentliyinin direktoru Mehman Əliyevin informasiya sorğusuna cavab verməyə, habelə bu barədə Ombudsman Aparatına məlumat verməyə çağırıb.

Ombudsmanın məktubu 24 fevral 2022-ci il tarixində göndərilib. İndiyədək cavab yoxdur.

Mehman Əliyev İnformasiya Əldə Etmək haqqında Qanuna uyğun olaraq İqtisadiyyat Nazirliyinin verməkdən imtina etdiyi məlumatı əldə etməkdə kömək üçün ombudsmana müraciət edib.

Məsələnin mahiyyəti ondadır ki, iki bağ sahibi arasında bağ sahələrinin sərhədləri haqqında mübahisənin araşdırılması zamanı saxtakarlıq və korrupsiya faktları aşkar edilib.

Xüsusən, keçmiş Bağ Təsərrüfatının bağ sahələri sxeminin itirilməsi bəhanəsi ilə Daşınmaz Əmlak Kadastr Xidmətinin və Dövlət Əmlak Məsələləri Xidməti yanında Ünvanlar Reyestrinin qənaətinə əsasən, sahələrin sərhədlərinin qanunsuz olaraq müəyyən edildiyini hesab etmək üçün əsas var.

Bununla əlaqədar İqtisadiyyat Nazirliyinə məktublar və informasiya sorğusu göndərilib. Amma nazirlik İnformasiya Əldə Etmək haqqında Qanunu pozaraq, suallara mahiyyəti üzrə cavab vermir. -0-