Operativ Qərargah: Azərbaycanda karantin rejimi sərtləşdiriləcək

Bakı/09.04.20/Turan: Nazirlər Kabineti yanında Əməliyyat Qərargahının nümayəndələri aprelin 8-də brifinqdə Azərbaycanda koronavirusa yoluxanların sayının artmasından narahatlıqlarını ifadə ediblər. Onların fikrincə, buna səbəb əhalinin karantin rejiminə əməl etməməsidir. Onlar xəbərdarlıq ediblər ki, pozuntuları davam edərsə, karantin sərtləşdiriləcək.

Qeyd edək ki, aprelin 8-də Azərbaycanda yoluxanların sayında gündəlik artım rekord həddə çatıb. Bu göstərici ilk dəfə üçrəqəmli həddə çatıb – sutka ərzində 105. Ümumilikdə 822 nəfər yoluxub, onlardan 63-ü müalicə olunub, 8 nəfər vəfat edib, 751 nəfər xəstəxanalardadır.

Yoluxanlardan 37 nəfərin vəziyyəti ağırdır. Bu barədə Tibbi Ərazi Bölmələrini İdarəetmə Birliyinin (TƏBİB) rəhbəri Ramin Bayramlı bildirib.

O 47 nəfərin vəziyyətini orta ağır olaraq xarakterizə edir. Koronavirusdan səkkiz ölüm hadisəsi ağır xroniki xəstəliklərin kəskinləşməsi ilə əlaqədardır. Xəstələrin çoxu həkimə gec müraciət etdiyindən vəziyyəti pisləşib.

Hazırda gündə 3-4 min test aparılır və tezliklə bu rəqəm 5 minə qədər artacaq. Ümumilikdə 53 mindən çox test aparılıb.

R.Bayramlı qeyd edib ki, COVİD-19 xəstələri arasında 2 yaşdan 90 yaşa qədər şəxslər var. “Xəstəliklə mübarizə aparıb və müalicə olunan 84 yaşında yoluxmuş vətəndaşımız olub”, - o deyib.

Xəstələrin sağalması və müalicə müddəti bir çox halda xəstənin fərdi reaksiyasından asılıdır.

R.Bayramlı yoluxanların arasında tibb işçilərinin də olduğunu bildirib, ancaq sayını açıqlamayıb.    Eyni zamanda xəstəxanalarda koronavirusun müalicəsi yönündə çalışanlardan yalnız bir həkim yoluxub.

R.Bayramlı yoluxanların sayının artmasından şikayətlənib və bu, əsasən vətəndaşların karantin qaydalarına əməl etməməsilə əlaqədardır. “Ötən çox sayda karantin pozuntusu olduğuna görə bu gün yoluxanların sayı kəskin artıb. Hər bir yoluxmuş şəxs daha 30-60 nəfəri yoluxdura bilər.

Rejimə əməl edilmədiyi təqdirdə daha ciddi tədbirlərin görülməsi üçün hökumətə müraciət edəcəyik”, - o deyib.

Öz növbəsində Nazirlər Kabinetinin mətbuat xidmətinin rəhbəri İbrahim Məmmədov xüsusi karantin rejiminin uzadılmasını istisna etməyib. “Bu, vəziyyətin inkişafından asılı olacaq.

Əgər yoluxanların sayı artarsa və rejimin pozulması davam edərsə, karantin rejimi uzadıla bilər. Karantin nəinki uzadıla bilər, hətta daha da sərtləşdirilə bilər”, -  İ. Məmmədov bildirib.

Onun sözlərinə görə, dövlət və özəl təşkilatlar iş icazəsi vermək hüququndan sui-istifadə edirlər. O, qanunu pozanlar arasında mətbuatın da adını çəkib. “Vəziyyətin monitorinqi aparılır və   kiminsə küçəyə çıxmasına qanunsuz şərait yaradanlara nəzarət olunur, buna görə cəza tətbiq ediləcək”, - İ.Məmmədov deyib.06D-