Oqtay İsgəndərli: Qətl əvvəlcədən planlaşdırılıb və peşəkar killerlər tərəfindən həyata keçirilib

Fransa prokurorluğunun və polisinin istintaq qrupu Vİdadi İsgəndərlinin qətli ilə bağlı araşdırmaları davam etdirir. Bu barədə mərhumun qardaşı Oqtay İsgəndərli bildirib.

"İstintaq qrupunun versiyalarından biri budur ki, Vidadi İsfəndərlinin qətli əvvəlcədən planlaşdırılıb və peşəkar killerlər tərəfindən həyata keçirilib. Killerlər onun evində olan qiymətli əşyaları, məlumatlarının olduğu komputerini və telefonunu belə götürməyiblər", deyə o qeyd edib.

"İstintaq qapalı gedir, ailə üzvləri bir neçə dəfə istintaqda dindirilib. Amma hələ ki, istintaq Vidadinin ailəsinə nə sifarişçilər, nə də icraçılarla bağlı hər hansı məlumat verməyib", deyə o qeyd edib.

Qardaşı əlavə edib ki, Vidadi İsgəndərlinin nəşi hələ də ailəsinə verilməyib. Ailəsi onu Myuluz şəhərində dəfn etmək istəyir.

Xatırladaq ki, azərbaycanlı siyasi mühacir Vidadi İsgəndərli sentyabrın 29-da öz evində naməlum şəxslərin hücumuna məruz qalıb və oktyabrın 1-də xəstəxanada vəfat edib. Naməlum şəxslər ona 20-dən çox bıçaq xəsarəti yetirib.

İsgəndərli sosial şəbəkələrdə Azərbaycan hakimiyyətini kəskin və emosional şəkildə tənqid etməsi ilə məşhur idi.

O, 2011-ci ildə Bakıda həbs olunub və seçki komissiyalarının işinə mane olmaq ittihamı ilə 3,5 il müddətinə azadlıqdan məhrum edilib. İsgəndərli 2012-ci ilin dekabrında əfv sərəncamı ilə azadlığa buraxılıb və 2015-ci ildə Fransaya mühacirət edib.