Özbəkistan və Azərbaycan prezidentlərinin görüşü

Bakı/21.06.22/Turan: Çərşənbə axşamı Daşkənddə Özbəkistan və Azərbaycan prezidentlərinin təkbətək görüşü keçirilib.

Özbəkistan prezidentinin mətbuat xidməti bildirib ki,  Mirziyeyev və Əliyev ikitərəfli əlaqələrin genişləndirilməsilə bağlı fikir mübadiləsi aparıblar.

Əmtəə dövriyyəsinin və birgə müəssisələrin dinamik artımı qeyd edilib. Uğurlu birgə layihələrdən biri də 2021-ci ilin sentyabrında Azərbaycanda Özbəkistan avtomobillərinin yığılması üzrə müəssisənin işə salınması olub.

Səfər ərəfəsində keçirilmiş biznes-forum zamanı yarım milyard dollardan artıq investisiya-ticarət sazişləri imzalanıb.

İki ölkə ərazisində neft-qaz, qaz-kimya, toxuculuq, əczaçılıq, şərabçılıq və qida sahələrində kooperasiyanın perspektivləri müzakirə olunub.

Nəqliyyat kommunikasiyaları sahəsində əməkdaşlığın inkişafına xüsusi diqqət yetirilib. Multimodal nəqliyyat dəhlizlərinin inkişafının, yüklərin daşınması tariflərinin optimallaşdırılmasının vacibliyi vurğulanıb.

Dövlət başçıları beynəlxalq və regional vəziyyətlə bağlı fikir mübadiləsi aparıblar.

Sonra danışıqlar nümayəndə heyətlərinin iştirakı ilə davam edib. Danışıqlar başa çatdıqdan sonra ikitərəfli sazişlər imzalanıb. 02D