Parisdə üç president nə haqda danışıb?

Oktyabrın 27-də axşam Parisdə Fransa prezidenti Fransua Oland Azərbaycan və Ermənistanın dövlət başçıları ilə görüşüb. Görüşdə ATƏT-in Minsk Qrupunun həmsədrləri də iştirak ediblər.

Bu görüşdən əvvəl Oland İ.Əliyev və S.Sarkisyanla təkbətək görüşüb.

Yelisey Sarayının görüşün yekunları ilə bağlı yaydığı məlumatda deyilir ki, Fransa  bu yay cəbhədə vəziyyətin kəskinləşərək böyük sayda insan tələfatı ilə nəticələnməsi fonunda Azərbaycan və Ermənistan arasında birbaşa dialoqun bərpasına xidmət edir.

Görüş zamanı Fransa prezidenti tərəflər arasında gərginliyin  səmərəli şəkildə azaldılmasının vacibliyini qeyd edib.

Oland Azərbaycan və Ermənistan prezidentlərini beynəlxalq hüquq prinsiplərinə və Minsk Qrupunun həmsədrləri tərəfindən müəyyən edilmiş prinsiplərə uyğun olaraq Dağlıq Qarabağ münaqişəsinin davamlı şəkildə nizamlanması üzrə danışıqlarda öz səylərini artırmağa çağırıb.

O həmçinin status-kvonun yolverilməz olduğunu da vurğulayıb.

Oland Azərbaycan və Ermənistan prezidentlərini fikir ayrılıqlarının aradan qaldırılmasına  və öz əhalisini sülhə hazırlamaq üçün vacib olan siyasi iradə nümayiş etdirməyə çağırıb.

 Azərbaycan və Ermənistan prezidentləri 2015-ci ilin sentyabrında Nyu-Yorkda BMT Baş Assambleyasının sessiyası çərçivəsində dialoqun davam etdirilməsi barədə razılığa gəliblər.

Məlumata görə, nahar zamanı  Oland və qonaqlar Qafqaz regionunun inkişafı, onun Fransa ilə münasibətlərini müzakirə ediblər.-02D-