Parlament �Prokurorluq haqqında� qanuna dəyişiklik edib

Bakı/18.11.17/Turan: Konstitusiya Azərbaycan prokurorluğunun qanunvericilik və icra hakimiyyəti orqanlarından hər hansı asılılığını istisna edir. Cümə günü Milli Məclis "Prokurorluq haqqında" qanunun 44-cü maddəsinə belə məzmunda dəyişiklik edib. Bu barədə Milli Məclisin mətbuat xidməti xəbər verib.

"Prokurorluq haqqında" qanunun 44-cü maddəsinin hazırda qüvvədə olan mətnində deyilir ki, "Azərbaycan Respublikasının baş prokuroru Azərbaycanın dövlət başçısına - Azərbaycan Respublikasının prezidentinə prokurorluğun fəaliyyəti haqqında mütəmadi olaraq məlumat verir".

Dəyişiklikdən sonra bu mətn xeyli dəyişir. Milli Məclisin dəyişikliyindən sonra həmin maddədə əlavə olaraq deyilir ki, "Azərbaycan Konstitusiyasına müvafiq olaraq dövlət hakimiyyəti hakimiyyətlərin bölünməsi prinsipi əsasında təşkil edilir. Qanunvericilik hakimiyyətini Milli Məclis həyata keçirir, icra hakimiyyəti Azərbaycan prezidentinə məxsusdur, məhkəmə hakimiyyətini isə Azərbaycan məhkəmələri həyata keçirir. Azərbaycan Prokurorluğu məhkəmə hakimiyyəti sisteminə daxil olmaqla, vahid mərkəzləşdirilmiş orqandır. Konstitusiya bu orqanın qanunvericilik və İcra hakimiyyəti orqanlarından hər hansı asılılığını istisna edir".

Parlamentin hüquq siyasəti və dövlət quruculuğu komitəsinin sədri Əli Hüseynov dəyişikliyin qanunvericiliyin təkmilləşdirilməsi məqsədi ilə, Avropa Şurasının korrupsiyaya qarşı dövlətlər qrupunun (GRECO) təklifi ilə edildiyini bildirib.

Milli Məclis "Prokurorluq orqanlarında qulluq keçmə haqqında" qanuna da dəyişikliklər edib.

Həmin dəyişikliklər prokurorluq işçilərinin attestasiyası və fəaliyyətinin qiymətləndirilməsi ilə bağlıdır.-0-