Parlament seçkilərində seçkiqabağı təşviqat başlayıb

Bakı/17.01.20/Turan:  Azərbaycanda fevralın 9-da keçiriləcək növbədənkənar parlament seçkilərində seçkiqabağı təşviqat mərhələsi başlayıb.

MSK-nın son məlumatına görə, parlamentdəki 125 yer uğrunda mübarizəyə 1623 namizəd qatılıb. Bu, Azərbaycanda parlament seçkiləri tarixində rekord saydır.

Partiyalar arasında ən çox namizəd hakim Yeni Azərbaycan Partiyasınındır - 123.

Müsavat Partiyasından 59 dairədə (4 dairənin hr birində partiyanın iki namizədi var) 63 namizəd qeydə alınıb.

Müsavat Partiyası aparat rəhbəri Gülağa Aslanlı bildirib ki, partiyanın əvvəldən 80-dən çox dairədə namizədləri olub. Ancaq süni əngəllər və təzyiqlər səbəbindən bəzi Müsavatçılar qeydiyyata alınmayıb. Onun fikrincə, bu, qəsdən edilib ki, partiya İctimai Televiziyada təşviqat üçün pulsuz efir vaxtı əldə edə bilməsin.

“REAL Respublikaçılar” İttifaqı - REAL Partiyasının və bitərəf iddiaçıların blokundan 31 namizəd qeydiyyata alınıb. Eyni zamanda REAL Partiyasının lideri İlqar Məmmədov və təşkilatın iki üzvü - Rəsul Cəfərov və Zaur Qurbanlının məhkumluğu bəhanəsilə seçkilərdə iştirakından imtina edilib. Halbuki, AŞ Nazirlər Komitəsi Bakını Strasburq məhkəməsinin qərarlarını icra etməyə və onların üzərindən məhkumluğu götürməyə çağırıb.

“Hərəkat” seçki blokundan 18 namizəddən 16-ı qeydiyyata alınıb.

Beləliklə, yalnız hakim Yeni Azərbaycan Partiyası pulsuz təşviqat hüququ əldə edib. Belə hallar əvvəllər də olub və o zaman sonra YAP bu hüquqdan istifadə etməkdən imtina edib.

Partiyadakı mənbə Turan-a bildirib ki, bu gün pulsuz təşviqatdan istifadə edib-etməmək barədə qərar qəbul ediləcək.

Seçkiqabağı kampaniya səsvermədən bir gün öncə 8 fevral saat 8: 00-da başa çatacaq. -06D-