Paşinyan anklavları dəyişdirməyi təklif edir, bunun hansı prinsiplə həyata keçiriləcəyinə isə dəqiqlik gətirmir

Bakı/11.06.21/Turan: İyunun 11-də Berd şəhərində keçirilən seçkiqabağı mitinq zamanı Ermənistan baş naziri səlahiyyətlərini icra edən Nikol Paşinyan anklavlar mövzusuna toxunub.

“Anklav anklavla dəyişdirilməlidir və Azərbaycanın nəzarəti altında olan onların nəzarəti altında qalıb, bizim nəzarətimiz altında olan isə bizim olaraq qalır”, deyə o bildirib.

Paşinyan həmçinin bildirib ki, Ermənistanın Tavuş vilayətinin onlarla kvadrat kilometri Azərbaycanın nəzarəti altındadır.

“Bu gün bizim kəndlərimizdə onların nəzarəti altında olan şumluq torpaqlar var”, deyə Nikol Paşinyan bildirib. Bu məsələ danışıqlar masasına qoyulub və onlar deyiblər ki, məsələyə baxılmalıdır, deyə Paşinyan qeyri-müəyyən şəkildə bildirib.

Qeyd edək ki, Ermənistan üç anklavda 7 Azərbaycan kəndini, Qazax rayonunda iki anklavı və Naxçıvanın Şərur rayonunda bir anklavı zəbt edib.

Bundan başqa, ermənilər Qazax və Şərurun sərhəd bölgəsindəki ərazilərini işğal edib. Buna görə Paşinyanın bir anklavı – Artsvaşeni (Başkənd) üç anklavla dəyişdirmək təklifi məntiqsiz səslənir. Bu bəyanatın Ermənistanın Qazaxla həmsərhəd olan Berd şəhərində səsləndirildiyini nəzərə alsaq, bunu seçkiqabağı təşviqat kimi qiymətləndirmək olar. -02D-