Peskov: Dağlıq Qarabağın mənsubluğu BMT TŞ-nin qətnamələri ilə müəyyən edilib

Bakı/04.12.20/Turan: Rusiya digər ölkələr kimi Dağlıq Qarabağın statusu ilə bağlı mövqeyini dəyişməyib. Bu ərazinin mənsubluğu kifayət qədər çoxdan Təhlükəsizlik Şurasının qətnamələri (822, 853, 874 və 884 saylı qətnamələr Dağlıq Qarabağın Azərbaycana məxsus olduğunu bəyan edir-red.) ilə müəyyənləşib. Bu barədə RF prezidentinin mətbuat katibi Dmitri Peskov bildirib, RİA Novosti xəbər verir.

"Bu ərazinin mənsubluğu Təhlükəsizlik Şurasının müvafiq qətnamələri ilə kifayət qədər çoxdan müəyyənləşdirilib. Bütün bunlar Təhlükəsizlik Şurasının qətnamələrində göstərilib. Rusiya heç nəyi dəyişməyib. Əslində, heç bir ölkə dəyişməyib", - Peskov müharibədən və Ermənistan, Azərbaycan və RF liderlərinin razılaşmasından sonra Qarabağın statusu ilə bağlı Rusiyanın münasibətinin dəyişib-dəyişməməsi barədə sualın cavabında deyib.

Peskovdan Rusiya sülhməramlılarının Qarabağda münaqişə tərəflərilə qarşılıqlı fəaliyyəti barədə sualla yanaşı, hazırda Qarabağda "rəhbər”in kim olduğunu da soruşublar.

"Əslində orada rəhbər yoxdur. Orada iki münaqişə tərəfi var-bunlar Ermənistan və Azərbaycandır. Bu tərəflər Rusiya ilə birlikdə sülh haqqında məlum bəyanatı imzalayıblar. Və bu bəyanatın müddəalarının yerinə yetirilməsi üçün  Rusiya hərbçiləri, həm də təkcə hərbçilərdən ibarət olmayan Rusiya humanitar missiyası həm azərbaycanlılarla, həm də ermənilərlə öz hərəkətlərini koordinasiya edirlər”, -  Peskov bildirib.—0-