Polis çavuşu: Müxalif jurnalistləri qırmaq lazımdır

Azadliqnews.tv-nin bu gün polis tərəfindən saxlanılmış müxbiri Dəyanət Məmmədov 40 dəqiqə sonra sərbəst buraxılıb.

Onun saxlanılmasına metronun “Azadlıq prospekti” stansiyasının girişində yaranmış basabasın videoçəkilişini aparması səbəb olub. Basabas metronun giriş aparatlarının işləməməsi ilə əlaqədar yaranıb.

Jurnalisti saxlayan polis çavuşu onu metrodakı polis otağına aparıb, burada onun mobil telefonu, noutbuku və videokamerası əlindən alınıb. Bundan sonra polis videokameranın yaddaşını silib, Məmmədovun çantasında axtarış aparıb və iş yeri ilə maraqlanıb.

Məmmədovun “Azadlıq tv”nin əməkdaşı olduğunu öyrənən polislərdən biri “müxalifət jurnalistləri virus kimidir, onları qırmaq lazımdır” deyib. 

Jurnalistin saxlanması haqqında rəhbərliyə məruzə edildikdən 40 dəqiqə sonra Məmmədovun sərbəst buraxılması haqqında göstəriş daxil olub.

“Azadlıq tv” redaksiyası hadisənin araşdırılması, jurnalisti saxlanmaya, axtarışa və təhqirlərə məruz qoymuş polisin cəzalandırılması məqsədilə DİN-ə müraciət etmək niyyətindədir. -06D- 

“Azadliqnews.tv”nin əməkdaşı saxlanılıb

Bu gün azadliqnews.tv-nin əməkdaşı Dəyanət Məmmədov “Azadlıq prospekti” metrostansiyasınn yaxınlığında metro polisi tərəfindən saxlanılıb.

Azadliqnews.tv-nin redaktoru Əfqan Muxtarlının Turan-a verdiyi məlumata görə, jurnalist metro girişində yaranmış basabası videoya çəkirdi. 

Muxtarlının sözlərinə görə, jurnalist telefonla yalnız saxlanıldığı barədə redaksiyaya məlumat verə bilib. Sonra onun telefonu söndürülüb. Redaksiya jurnalistin harada olduğunu araşdırır. 

Öz növbəsində, Daxili İşlər Nazirliyinin mətbuat xidməti jurnalistin saxlanması haqqında məlumatın araşdırıldığını bildirib.-16B06-