Polis İsrail səfirliyi qarşısında etiraz aksiyasının qarşısını alıb

Bakı/08.06.18/Turan: Cümə günü axşam saatlarında polis hər il Ramazan ayının son cümə günü Fələstin xalqı ilə həmrəylik və Qüdsün işğalına etiraz əlaməti olaraq qeyd olunan Qüds Günü münasibətilə İsrail səfirliyi qarşısında aksiya keçirilməsinin qarşısını alıb.

Piketin təşkilatçılarından biri, Qarabağın Uğrunda İslami Müqavimət Hərəkatının lideri Rövşən Əhmədli aksiya başlamazdan əvvəl evdən çıxarkən saxlanılıb. O, Binəqədi rayon polis idarəsinin 7-ci polis bölməsinə aparılıb və aksiya başa çatdıqdan sonra buraxılıb. Polisdə Əhmədliyə icazəsiz aksiya keçirilməsinin yolverilməz olduğunu bildiriblər.

Əhmədov özü Turan-ın müxbiri ilə söhbətində bildirib ki, toplaşmaq azadlığına Konstitusiyada zəmanət verilib. Digər tərəfdən, təşkilatçılar şəhər administrasiyasına əvvəlcədən məlumat veriblər, icra hakimiyyəti piketin keçirilməsinin "məqsədəuyğun olmadığını" hesab edib.

"Biz sadəcə dinc formada Qüdsün işğalına, İsrailin BMT Təhlükəsizlik Şurasının qətnamələrinə məhəl qoymamasına etirazımızı bildirmək istəyirdik. Bu, erməni təcavüzünə və işğalına məruz qalan Azərbaycan üçün də aktualdır.

Hesab edirik ki, BMT Təhlükəsizlik Şurasının Fələstin-İsrail münaqişəsi, Qarabağ münaqişəsi və bütün digər məsələlərlə bağlı qətnamələri yerinə yetirilməlidir", deyə Əhmədli bildirib.

O qeyd edib ki, polis aksiyanın təxminən 15 iştirakçısını saxlayıb, onlar Yasamal rayonu 27 və 29-cu polis bölmələrinə aparılıblar.

Saat 17.30-a qədər 27-ci bölmədən bütün saxlanılanlar azad edilmişdi. -06B-