Polkovnik İsa Sadıqov AXCP-yə üzv olmaq üçün müraciət edib

Azərbaycan ordusunun istefada olan polkovniki, keçmiş briqada komandiri, hazırda mühacirətdə olan İsa Sadıqov AXCP-yə üzv olmaq üçün müraciət edib.  

İ.Sadıqovun bəyanatında deyilir ki, Xalq Cəbhəsi bütün bu illər ərzində öz prinsipial mübarizəsindən bir an belə geri durmayıb, Azərbaycan insanına haqq və ədalət, azadlıq uğrunda mübarizənin nümunələrini verib və bu nümunələri bu günlərdə də yaratmaqdadır. 

“Mühacirətdə olsam da, öz imkanlarımı Azərbaycanda demokratiya və azadlıq uğrunda ardıcıl mübarizə aparan cəbhəçilərin imkanları ilə birləşdirməyim ən doğru qərar olardı. Buna görə də, tərəddüd etmədən Azərbaycan Xalq Cəbhəsi Partiyasına üzv olmaq barədə qərar verirəm. Cəbhəçi dostlardan xahiş edirəm ki, məni partiyanın sıravi üzvü olaraq özləri ilə yanaşı görsünlər və Əliyevin istibdad rejiminə qarşı onlarla bir yerdə mübarizə aparmaqdan qürur duyuram”, deyə o qeyd edib. 

Öz növbəsində, AXCP sədrinin müavini Gözəl Bayramlı Turan-a bildirib ki, İsa Sadıqovun müraciətinə AXCP Rəyasət Heyətinin növbəti iclasında baxılacaq. -03B-