Pravoslavlar 30 ölkədə Milad bayramını qeyd edirlər

Pravoslav dindarları İsa Peyğəmbərin mübarək mövludu -  müqəddəs Milad bayramını qeyd edirlər. 30-dan çox ölkədə bununla bağlı tədbirlər keçirilir.

Yanvarın 7-nə keçən gecə Azərbaycanın pravoslav məbədlərində İsa Peyğəmbərin mübarək mövludu ilə bağlı bayram tədbirləri keçirilib. 

Jen Mironosits məbədində Bakı və Xəzəryanı yepiskopu Aleksandr bayram liturqiyasını icra edib. Turan bildirib.

Ötən gün prezident İlham Əliyev Azərbaycan xalqını və ölkənin xristian icmasını Milad bayramı münasibətilə təbrik edib.

“Özündə yeniliyi, həmrəyliyi və əmin-amanlığı təcəssüm etdirən Milad bayramı xristian icması tərəfindən hər il ölkəmizdə yüksək əhval-ruhiyyə və təntənə ilə qeyd olunur. Bu əziz gün münasibətilə bir daha hər birinizə bayram təbriklərimi yetirir, ailələrinizə xoşbəxtlik və firavanlıq arzulayıram”, - dövlət başçısı bildirib.

Rusiyada  bayramın qeyd olunduğu əsas yer Xrista Spasitel  məbədi olub. Yanvarın 6-dan 7-nə keçən gecə minlərlə dindar ora toplaşıb. RBK bildirib.

Milad bayramı Yulian təqvimi üzrə - katoliklərdən 13 gün gec qeyd olunur. Gecə liturqiyasını Patriarx Kiril icra edib. O, dindarları bayram münasibətilə təbrik edib.

“Bayramda hədiyyə almaq adətdir. Biz də Allahdan ailələrimizə, xalqlarımıza, dövlətlərimizə sülh istəyirik. İdarə edənlərə müdriklik, bütün insanlara xeyir-dua, hüzn içində olanlara təsəlli istəyirik. Bayramda hədiyyə vermək də adətdir. Gəlin,  biz də movlud günü qeyd olunan İsa Peyğəmbərin naminə bir konkret iş görək ki, bunun da kiməsə faydası olsun”, - o bildirib.

Rusiya prezidenti Vladimir Putin bayramı Voronejdə Pokrov Presvyatoy Boqoroditsı məbədində kilsə yanındakı sığınaqda yaşayanlarla keçirib.0—