Prezident Administrasiyası İlham Əliyevin Moskvaya səfəri haqqında məlumatı təkzib edib (YENİLƏNİB)

Prezident Administrasiyasının adını söyləməyən nümayəndəsi prezident İlham Əliyevin Moskvaya işgüzar səfəri haqqında məlumatı təkzib edib. Bu zaman mənbə Turan-ı təxribatda ittiham edib.

Bununla əlaqədar olaraq qeyd etmək istərdik ki, əldə etdiyimiz məlumatı həmin Prezident Administrasiyasında yoxlamaq qeyri-mümkün görünürdü, belə ki, orada Turan-la əlaqə qurmaq istəmirlər.

Məlumata gəlincə, onda rəsmi təsdiq olmadığı qeyd edilirdi. Buna görə Prezident Administrasiyasının uzağa gedən rəyləri yersizdir.

Dövlət başçısının dost ölkəyə səfəri haqqında məlumatın (hətta həqiqətə uyğun olmasa belə) niyə təxribat kimi qiymətləndirildiyini anlamaq çətindir. Həm də bu kimi işgüzar və ya xüsusi səfərlər geniş yayılmış dünya təcrübəsidir və burada Azərbaycan istisna deyil. -02В-

2013 Avqust 01 (Cümə axşamı) 15:15:04

Moskvadakı mənbələrin məlumatına görə, Azərbaycan prezidenti İlham Əliyev iyulun 31-də axşam Moskvaya xüsusi səfərə gedib.

Mənbə bildirir ki, Əliyev Moskvanın tam mərkəzində, Kremldən iki addım məsafədə yerləşən dəbdəbəli Lotte Hotel-də yerləşib.

Həmçinin, Əliyevin artıq baş nazir Dmitri Medvedevlə qeyri-rəsmi görüşü olduğu bildirilir. Amma prezident Putinin onunla görüşüb-görüşməyəcəyi məlum deyil.

Rəsmi mənbələr Əliyevin Moskvaya səfəri haqqında heç bir məlumat vermir. -0-