Prezident İham Əliyev ATƏT Parlament Assambleyasının sədri Marqaret Sederfelti qəbul edib

Bakı/23.05.23/Turan: Çərşənbə axşamı dövlət başçısı İham Əliyevin ATƏT Parlament Assambleyasının sədri Marqaret Sederfeltlə görüşündə Cənubi Qafqaz regionunda sülhün bərpasında əməkdaşlıq məsələləri müzakirə edilib.

Prezidentin mətbuat xidmətinin məlumatında deyilir ki, tərəflər Milli Məclisin və ATƏT Parlament Assambleyasının birgə təşkilatçılığı ilə “Yaşıl iqtisadiyyat, nəqliyyat əlaqələndirilməsi və dayanıqlı inkişaf vasitəsilə təhlükəsizlik və sabitliyin təşviqində milli parlamentlərin rolu” mövzusunda Bakıda keçirilən beynəlxalq konfransın əhəmiyyətini vurğulayıblar.

Sederfelt Ermənistanla Azərbaycan arasında sülh danışıqlarının gedişilə maraqlanıb və işğaldan azad edilmiş Zəngilan rayonuna səfər etmək planını açıqlayıb.

Əliyev Vaşinqton və Brüsseldə Ermənistan nümayəndələrilə danışıqların gedişi və son görüşlər, qarşıdakı görüşlər və gələcək sülh müqaviləsi barədə məlumat verib.

O həmçinin regionda nəqliyyat kommunikasiyalarının açılmasının perspektivləri barədə danışıb.

İlham Əliyev qeyd edib ki, Azərbaycan təqdim etdiyi 5 prinsip, xüsusilə dövlətlərin ərazi bütövlüyünün və suverenliyinin qarşılıqlı şəkildə tanınması əsasında sülh müqaviləsini imzalanmağa hazırdır. Bundan əlavə, Bakı Cənubi Qafqaz ölkələrinin vahid iqtisadi inkişaf modelində birləşməsi ideyasını irəli sürüb. 0