Prezident İlham Əliyev: “Azərbaycan və İtaliya hərbi-texniki əməkdaşlığa başlayıblar”

Azərbaycan və İtaliya arasında münasibətlər strateji tərəfdaşlığa əsaslanır və "Leonardo" C-27J Spartan hərbi- nəqliyyat təyyarəsinin Azərbaycana gətirilməsi hərbi-texniki sahədə əməkdaşlığın başlanğıcı oldu.

Bu barədə Azərbaycan prezidenti İlham Əliyev İtaliyanın müdafiə naziri Quido Krozettonun rəhbərliyi və xarici işlər və beynəlxalq əməkdaşlıq nazirinin müavini Edmondo Çiriellinin iştirakı ilə nümayəndə heyətini qəbul edərkən bildirib.

Dövlət başçısı İtaliyanın çox inkişaf etmiş hərbi-texniki sənayeyə malik olduğunu vurğulayaraq, bu gün təqdim olunan C-27J Spartan hərbi-nəqliyyat təyyarəsinin Azərbaycana gətirilməsini ikitərəfli əlaqələrin yüksək səviyyəsinin göstəricisi kimi dəyərləndirib.

O əlavə edib ki, Azərbaycan və İtaliyanın bir çox sahələrdə strateji tərəfdaş kimi fəaliyyət göstərirlər.  “Avropa məkanında ticarət əlaqələrimizin böyük hissəsi İtaliyanın payına düşür və ticarət dövriyyəsi 15 milyard dolları ötüb”, - Əliyev deyib.

O, bir çox İtaliya şirkətinin Azərbaycanda uğurla fəaliyyət göstərdiyini və bir sıra layihədə iştirakını məmnunluqla qeyd edib.

“Neft-qaz sahəsindəki əməkdaşlığımız təkcə ölkələrimiz üçün yox, bütün Avropa məkanı üçün önəm daşıyır”, - Əliyev deyib.

O qeyd edib ki, bunun inkişafının təməlində güclü siyasi əlaqələr dayanır və “Azərbaycan Respublikası ilə İtaliya Respublikası arasında strateji tərəfdaşlıq haqqında” birgə bəyannamə bu əlaqələrin əsasını təşkil edir.

Quido Krozetto 26 iyun - Silahlı Qüvvələr Günü münasibətilə dövlət başçısına təbriklərini çatdırıb. O, müdafiə sənayesi sahəsində əməkdaşlığın başlanmasından məmnunluğunu bildirib.