Prezident İlham Əliyev Azərbaycanın xaricdəki 8 diplomatik missiyasının rəhbərini geri çağırıb

Çərşənbə günü prezident İlham Əliyev Azərbaycanın xaricdəki bir sıra diplomatik nümayəndəliyinin rəhbərlərinin geri çağırılması haqda sərəncam imzalayıb.

Belə ki, Elxan Qəhrəmanov Birləşmiş Ərəb Əmirliklərində fövqəladə və səlahiyyətli səfir vəzifəsindən, Məmməd Əhmədzadə Argentina, Paraqvay, Boliviya, Çili və Uruqvayda  səfir vəzifəsindən, Tofiq Zülfüqarov Estoniya, Vəhdət Sultanzadə Türkmənistan, Zakir Həşimov Qazaxıstanda  səfir vəzifəsindən geri çağırılıb.

Prezident həmçinin Murad Nəcəfbəylini Azərbaycanın BMT-nin Cenevrə bölməsində və digər beynəlxalq təşkilatlarda daimi nümayəndə vəzifəsindən geri çağırıb.

Bundan əlavə, Azərbaycanın İstanbuldakı və Aktaudakı baş konsulları Həsən Zeynalov və Rəşad Məmmədov geri çağırılıblar.

Sərəncamlarda diplomatların geri çağırılmasının səbəbləri açıqlanmır. Çox güman ki, bu, onların diplomatik missiyasının başa çatması ilə bağlıdır. Çünki onlar 5-6 il, hətta bir qədər çox müddətdir ki, bu postu tutublar.

Vakansiyalara yeni təyinatlar hələlik açıqlanmayıb.—06В--