Son yenilənmə

(1 saat əvvəl)
Prezident İlham Əliyev: “Bizə desələr ki,  sizi Avropa İttifaqına qəbul edirik, bu, bizə lazımdırmı?”

Bakı/24.12.19/Turan: Bazar ertəsi dövlət başçısı İlham Əliyev 2019-cu ilin yekunları ilə bağlı dörd hökumətyönlü telekanala müsahibə verib.

İ.Əliyev avrointeqrasiyanın perspektivləri barədə sualın cavabında deyib ki, Aİ ilə ikitərəfli sazişin bağlanmasına dair danışırlar aparılır.   “Biz hesab edirik və təklif etmişik ki, bu saziş hər iki tərəfin maraqlarını təmin etməlidir, əks halda, sazişə ehtiyac qalmayacaq”, - İ.Əliyev vurğulayıb.  O, söhbətin hansı maraqlardan  getdiyini açıqlamayıb. Lakin əlavə edib ki, saziş bərabərhüquqlu tərəflər arasında imzalanmalıdır və Azərbaycanın milli maraqlarını əks etdirməlidir.

 Onun sözlərinə görə, gələcək sazişin bəndlərinin 90%-i razılaşdırılıb, qalanları “xoş niyyətli ab-hava çərçivəsində öz həllini tapmalıdır”.

İ.Əliyevin sözlərinə görə, mübahisəli bəndlərdən biri Azərbaycanın ÜTT-yə qəbulu ilə bağlıdır.

“Mən hesab edirəm ki, hələ vaxt gəlib çatmayıb. Bunun da səbəbi ondan ibarətdir ki, bizim ixracımızın əsas hissəsi hələ ki, neft-qaz məhsullarıdır. Biz daxili bazarımızı qorumalıyıq. Əgər biz indi ÜTT-yə üzv olsaq bizim istehsalçılar, o cümlədən sənaye sektorunda, kənd təsərrüfatı sektorunda böyük problemlərlə üzləşə bilərlər”, - İ.Əliyev bildirib.

Digər vacib məsələ energetika sektoru ilə bağlıdır. Belə bir bənd təklif olunur ki, Azərbaycanda təbii qazın daxili qiyməti ixrac qiyməti ilə bərabərlik təşkil etsin. Hazırda Azərbaycan istehlakçılarının təxminən 85 faizi təbii qazı çox ucuz qiymətə, yəni, dövlət tərəfindən verilmiş subsidiya əsasında alır, qiymət də min kubmetr üçün 100 manatdır. İxrac qiyməti isə bundan bir neçə dəfə böyükdür.

Əgər biz öz təbii qazımızı daxili qiymətlərlə satsaq, iqtisadiyyatımıza çox böyük ziyan dəyəcək. Çünki belə olan halda, ixrac qiyməti 58 dollar olmalıdır. Bu gün isə dünya bazarlarında, o cümlədən Avropa bazarlarında daxili qiymət, yəni, istehlakçıların ödədiyi qiymət təqribən 300, 400, 500 dollara bərabərdir”, - İ.Əliyev deyib.

Bu iki məsələ həllini tapmasa, müqavilə imzalanmayacaq, dövlət başçısı vurğulayıb. 

“Şərq tərəfdaşlığı”nın perspektivləri barədə sualın cavabında İ.Əliyev Bakının bu proqrama marağının olmadığını bildirib.    

Onun sözlərinə görə, bu proqram iştirakçılarının- keçmiş sovet respublikalarının  həm xarici siyasəti fərqlidir, daxili vəziyyətdə böyük fərqlər var, təbii ki, iqtisadi inkişaf fərqlidir.

“Onları bir proqramda birləşdirmək nə dərəcədə doğrudur? Ona görə bu proqramın gələcəyi haqqında bir şey demək çətindir.  Biz proqramdan çıxmırıq, ancaq proqramda da fəal iştirak etmək fikrində deyilik”, - prezident deyib.

Onun sözlərinə görə, Azərbaycan ona əsaslanır ki,  Avropa ölkələri ilə ikitərəfli münasibətlər qurmaq olar və bundan ötrü heç bir məhdudiyyət yoxdur.  

Bakı Dövlət Universitetinin 100 illiyi münasibətilə keçirilən mərasimdə Avropanın tənqid olunmasının və avrointeqrasiyadan imtinanın səbəbləri barədə sualın cavabında İ.Əliyev deyib ki,  Azərbaycanın Avropa İttifaqına daxil olması mümkün deyil. Onun sözlərinə görə, hazırda Avropada mərkəzdənqaçma qüvvələr güclənib, Breksit meydana çıxıb.    Avropa İttifaqının gələcək genişlənməsilə bağlı heç bir perspektiv yoxdur.

Aİ-nin şərtlərini qəbul edən və yerinə yetirən bəzi ölkələr ağır duruma düşüblər və təşkilata qəbul edilməyiblər.  

Bundan əlavə, Avropa müsəlman ölkələrinə mənfi yanaşır ki, bu da Türkiyənin nümunəsində öz təsdiqini tapır. “Əgər Türkiyəni qəbul etmirlərsə,  Azərbaycanı qəbul edəcəklərmi?”, - o deyib.

“İkincisi, lap tutaq ki, sabah bizə dedilər, bax, Azərbaycan belə ölkədir ki, biz Azərbaycanı filan tarixdə qəbul edəcəyik. Bu, bizə lazımdırmı? Avropada gedən proseslərə hər bir vətəndaş nəzər yetirəndə görür ki, hansı hadisələr baş verir, o cümlədən dini zəmində, milli-mənəvi dəyərlər zəminində. Bu proseslər bizə uyğundurmu? Əlbəttə ki, yox və bunu açıq deməliyik”, - İ.Əliyev vurğulayıb.

Sonra o deyib ki, Azərbaycanın taleyi Brüsseldə həll olunmamalıdır, artıq Azərbaycan imperiyanın tərkibində olub. 

“Müstəqillik dövründə biz özümüz öz taleyimizi kiməsə əmanət edə bilərik? Qətiyyən yox və qətiyyən biz buna gedə bilmərik”, - dövlət başçısı vurğulayıb. -02D-

 

Rəy yaz

Siyasət

Bizi sosial şəbəkələrdə izləyin

Xəbər lenti