Prezident İlham Əliyev Ermənistana məxsus vertolyotun vurulmasını təqdir edib

Dövlət başçısı İlham Əliyev Ağdamın Kəngərli kəndi yaxınlığında Ermənistana məxsus vertolyotun vurulmasını müsbət qarşılayıb. Bu barədə o, şənbə günü Azərbaycan Silahlı Qüvvələrinin Şəmkir hərbi birliyinin  qərargah binasının açılışında bildirib.

Bununla bağlı rəsmi məlumatda konkret vertolyot barədə danışılmır. Eyni zamanda qeyd olunur ki, prezident İ.Əliyev bu yaxınlarda Ermənistan Silahlı Qüvvələrinin qoşunların təmas xəttini pozması ilə bağlı təxribatını pisləyib və Azərbaycan Silahlı Qüvvələri tərəfindən bu təxribatın qarşısının uğurla alınmasını yüksək qiymətləndirib.

“Dövlət başçısı güclü döyüş qabiliyyətinə malik olan Silahlı Qüvvələrimizin bundan sonra da düşmənin hər hansı bir təxribatına layiqli cavab verəcəyinə əmin olduğunu bildirib. O, vəziyyətlə bağlı müvafiq göstərişlərini verib”, -rəsmi məlumatda deyilir.

Xatırladaq ki, insident noyabrın 12-də saat 13:45-də baş verib. Ermənistana məxsus iki hərbi vertolyot cəbhə xəttini keçərək Azərbaycaq SQ-nin postu üzərində görünüb. Sərhəd pozucularından biri daşınan zenit-raket kompleksi ilə vurulub, digəri isə Ermənistan tərəfə dönüb.

Düşmən vertolyotunu məhv edən hərbi qulluqçu ordenlə təltif edilib.-02D-