Prezident İlham Əliyev İsrailin Müstəqillik Günü münasibətilə bu ölkənin prezidentini təbrik edib və onu Bakıda gözləyir

Bakı/25.04.23/Turan: Azərbaycan-İsrail əlaqələri yüksələn xətlə inkişaf edir və yüksək  səviyyəyə çatıb. Bunun təməlində iki xalqı birləşdirən çoxəsrlik möhkəm dostluq və qarşılıqlı rəğbət hissləri dayanır. Bu barədə Azərbaycan prezidenti İlham Əliyevin İsrailin müstəqilliyinin 75-ci ildönümü münasibətilə İsrail prezidenti İsxak Hersoqa təbrik məktubunda deyilir.

İki dövlət arasında siyasi dialoqun yüksək səviyyəsi iqtisadiyyat, energetika, yüksək texnologiyalar, təhsil, hərbi-texniki və digər sahələrdə qarşılıqlı fəaliyyətin genişləndiriliməsi və zənginləşməsi üçün əlverişli şərait yaradır.

“Əminəm ki, İsraildə Azərbaycanın Ticarət və Turizm nümayəndəliklərinin açılmasının, bu il isə səfirliyin fəaliyyətə başlaması dövlətlərarası münasibətlərimizin gələcək inkişafına vüsət verəcək. İnanıram ki, xalqlarımızın və ölkələrimizin mənafelərinə uyğun olaraq Azərbaycan-İsrail dostluğu və əməkdaşlığının böyük potensialından daha dolğun istifadə etmək üçün qarşılıqlı səylərimizi bundan sonra da uğurla davam etdirəcəyik”, - məktubda qeyd olunur.

İlham Əliyev tezliklə İsrail prezidentilə Bakıda görüşmək ümidində olduğunu bildirib. -03-