Prezident İlham Əliyev Novruz bayramını Şuşada keçirir

Bakı/20.03.21/ Turan: Martın 20-də dövlət başçısı İlham Əliyev yenidən Şuşaya gedib. O, Novruz bayramı münasibətilə Cıdır düzündə tonqal qalayıb.

Prezident xalqa müraciətində Azərbaycanın tarixi torpaqlarının və onun mədəniyyət mərkəzi Şuşa şəhərinin azad edilməsini tarixi hadisə adlandırıb.

“Bizim üçün torpaqların azad edilməsindən daha vacib bir vəzifə yox idi. Bu işdə Azərbaycan ordusunun başlıca xidməti var. Döyüşçülərimiz dağlarda və meşələrdə hərəkət edərək, qayalara dırmanaraq şəhəri azad etdilər.

Şəhərin özündə onlar artilleriya və tanklara qarşı yalnız yüngül silahlardan istifadə edərək əlbəyaxa döyüşünə girdilər. Bu hərbçilər ən yüksək qiymətə layiqdirlər.

Biz Şuşanı qan bahasına azad etdik. Şuşa uğrunda döyüşlərdə yüzlərlə, minlərlə işğalçı məhv edildi.

Şuşanın azad edilməsi Vətən Müharibəsinin kulminasiyası idi. Məhz bundan sonra düşmən kapitulyasiya aktını imzaladı", -  İlham Əliyev deyib.

O qeyd edib ki, artıq Şuşanın və  işğaldan azad edilmiş digər rayonların bərpası üzrə işlər başlayıb və fəal şəkildə davam etdirilir. "Dağılmış hər şey bərpa olunacaq, çox şey yenidən tikilməlidir, amma bizim kifayət qədər gücümüz və istəyimiz var", - o bildirib.- 02B-