Prezident İlham Əliyev Şimali Kipr Türk Cümhuriyyətinin prezidentini qəbul edib

Bakı/14.10.23/Turan: Oktyabrın 14-də Azərbaycan prezidenti İlham Əliyev Şimali Kipr Türk Cümhuriyyətinin prezidenti Ersin Tatarı qəbul edib.

Dövlət başçısının saytı bildirib ki, görüşdə türk xalqları arasında tarixi əlaqələrin genişləndirilməsi, humanitar, mədəniyyət, təhsil, idman sahələrində əməkdaşlıq məsələləri müzakirə edilib.

Bununla əlaqədar Əliyev səmərəli platforma kimi Türk Dövlətləri Təşkilatının rolunu qeyd edib.

Görüşdə Şimali Kipr Türk Cümhuriyyətinin İqtisadi Əməkdaşlıq Təşkilatında müşahidəçi qismində fəaliyyətinə toxunulub. Bunu nəzərə alaraq, onun Türk Dövlətləri Təşkilatı yanında da müşahidəçi statusunun olması tam məntiqlidir.

Öz növbəsində Tatar Azərbaycanın öz suverenliyini tam təmin etməsi münasibətilə Əliyevi təbrik edib. O, Bakıda Şimali Kipr Mədəniyyət Günlərinin keçirilməsilə bağlı məmnunluğunu ifadə edib.

Görüş zamanı turizm, elm, təhsil və tələbə mübadiləsi sahələrində əməkdaşlıq məsələləri müzakirə olunub.06В