Prezident İlham Əliyev:  �Ümid edirik ki, 2019-cu il nizamlanma prosesinə yeni impuls verəcək� 

Bakı/13.12.18/Turan: Azərbaycan prezidenti İlham Əliyev ümidvar olduğunu bildirib ki, 2019-cu il Qarabağ münaqişəsinin nizamlanmasına təkan verəcək. Bu barədə o, dekabrın 13-də Bakıda RF XİN rəhbəri Sergey Lavrov ilə görüşündə bildirib.

"Sizin səfəriniz bizim ikitərəfli əməkdaşlığın vacib məsələlərini müzakirə etmək üçün yaxşı imkandır. Özü də bu səfər Yeni il ərəfəsindədir. Səfər bizim birgə işimizin 2019-cu il üçün planlarını müəyyənləşdirmək, həm də bu il hansı işlərin görüldüyünü təhlil etmək üçün yaxşı imkandır", - prezidentin saytı İ.Əliyevdən sitat gətirir.

Onun fikrincə, 2018-ci il münasibətlərin inkişafı baxımından çox məhsuldar il olub, yüksək səviyyədə xeyli görüşlər keçirilib.

"Biz beynəlxalq strukturlarda fəal qarşılıqlı fəaliyyət göstəririk. Lap bu yaxınlarda - bir həftə əvvəl MDB-nin Sankt-Peterburqda qeyri-formal sammiti keçirildi. Bu, təşkilatın üzvlərinin fəaliyyətini gücləndirmək üçün çox əlamətdar hadisə idi. Bu il aktiv fəaliyyətə başlayan hökumətlərarası komissiyanın yeni tərkibi formalaşdırılıb. Bu yaxınlarda görüşəcəklər. Həmçinin Rusiya-Azərbaycan İşgüzar Şurasının yeni tərkibi formalaşdırılıb. Yəni, biz ticari-iqtisadi əlaqələrə, investisiya proqramlarına dinamika vermişik. Düşünürəm ki, nəticələr çox yaxşı olacaq"", - İ.Əliyev bildirib.

O deyib ki, S.Lavrov ilə görüşü zamanı Ermənistan-Azərbaycan Dağlıq Qarabağ münaqişəsinin həlli ilə bağlı məsələlər də müzakirə ediləcək. "Ümid edirik ki, 2019-cu il nizamlanma prosesinə yeni impuls verəcək. Əlbəttə ki, münaqişənin həlli ilə bağlı ATƏT-in Minsk Qrupunun həmsədrlərindən biri kimi Rusiyanın səylərinə ümid edirik", - İ.Əliyev vurğulayıb.

O, "Şimal-Cənub" dəhlizinin yaradılması ilə bağlı fəaliyyətin nəticələrini məmnunluqla qeyd edib. "Biz bu istiqamətdə fəal qarşılıqlı fəaliyyət göstəririk. Müvafiq strukturlar, nəqliyyat qurumları çox məhsuldar işləyirlər. Biz bu il artıq yaxşı nəticələri görürük. Biz digər tərəfdaşlarımızla, qonşularımızla bu layihəni mümkün qədər tez başa çatdırmaq üçün birgə səylərimizi davam etdirəcəyik", - prezident bildirib. -06D--