Prezident İlham Əliyevin Türkiyənin baş prokuroru və nəqliyyat naziri ilə görüşləri

Bakı/31.05.31/Turan: Mayın 30-da dövlət başçısı İlham Əliyev Türkiyə Ali Məhkəməsinin baş prokuroru Bəkir Şahinin rəhbərlik etdiyi Türkiyə nümayəndə heyətini qəbul edib.

Görüş zamanı iki ölkənin prokurorluq orqanlarının əməkdaşlığı və Azərbaycanın prokurorluq sahəsində islahatların aparılmasında Türkiyənin təcrübəsindən istifadə imkanları müzakirə olunub.

Həmin gün İlham Əliyev Türkiyənin nəqliyyat və infrastruktur naziri Adil Karaismayıloğlunun rəhbərlik etdiyi nümayəndə heyətini qəbul edib.

Qonağı salamlayan Əliyev qeyd edib ki, İkinci Qarabağ Müharibəsindən sonra nəqliyyat sahəsinin əhəmiyyəti artıb. "İndi masada yeni layihələr var. Biz yeni dəhliz - Zəngəzur dəhlizi üzərində işləyirik. O, Türkiyə ilə Azərbaycan arasında yeni əlaqəni təmin edəcək", - Əliyev deyib.

O qeyd edib ki, əvvəllər Ermənistan bu məsələyə etiraz edirdi, lakin son zamanlar "mənə məlumat verilir ki, Ermənistan tərəfi artıq bu dəhlizin labüdlüyü ilə bağlı vəziyyəti düzgün təhlil edir".

Onun sözlərinə görə, bu məsələnin müzakirəsi Azərbaycan, Rusiya, Ermənistan baş nazirlərinin müavinləri səviyyəsində üçtərəfli formatda aparılır.

"Biz artıq Horadizdən Ermənistan sərhəddinə qədər azad olunmuş ərazilərdə dəmir yolunun çəkilişinə start vermişik. Əminəm ki, yaxın iki il, bəlkə iki il yarım ərzində bu dəmir yolu tamamilə istifadəyə veriləcək", - Əliyev deyib.

Ermənistanda Zəngəzur dəhlizinin bir hissəsi tikilməlidir. Beləliklə, yeni dəhliz açılacaq və Azərbaycanla Türkiyə arasında bu əlaqə daha da möhkəm olacaq, Əliyev qeyd edib.

Öz növbəsində, Adil Karaismayıloğlu deyib ki, Türkiyə tərəfi Naxçıvanla Qars arasında dəmir yolu layihəsinin hazırlanmasını başa çatdırıb. Bu proqramın həyata keçirilməsi Naxçıvan ərazisilə yeni dəhlizin yaradılmasına imkan verəcək. -02D-