Prezident Petr Poroşenkonun prioritetləri

Ukrayna prezidenti Petr Poroşenko iyunun 7-də andiçmə mərasimindən sonrakı nitqində siyasətinin bir sıra prioritet məsələləri üzrə mövqeyini ifadə edib.

Avropa İttifaqı ilə Assosiasiya Sazişi

“Avropa seçimi milli idealımızın əsas hissəsidir, bu, əcdadlarımızın etdiyi seçimdir. Azad yaşamaq, ehtiyacsız yaşamaq, sülh və təhlükəsizlik içində yaşamaq üçün atmalı olduğumuz addımdır. Bütün bunlar Aİ ilə siyasi assosiasiya və azad ticarət zonası haqqında Sazişdə yazılıb. Çoxlarınız mənimlə birlikdə bu sənədin tərtib edilməsində iştirak etmisiniz. İndi onu həyata keçirməyi arzu edirəm. Amma bunlardan biz sazişin iqtisadi hissəsini mümkün qədər tez imzalamalıyıq. Əziz dostlar, mənim qələmim artıq əlimdədir və mən hazıram. Aİ müvafiq qərarı qəbul edən kimi Ukrayna prezidentinin imzası ani olaraq bu mühüm sənədin altında yer alacaq. Assosiasiya Sazişinə biz Ukraynanın Avropa İttifaqına tamhüquqlu üzvlüyünün ilk addımı kimi baxırıq”.

Vaxtıından əvvəl parlament seçkiləri

“Vaxtından əvvəl keçiriləcək parlament seçkiləri hakimiyyətin tam olaraq yenidən qurulması üzrə ictimai tələbatın mühüm hissəsidir. Hörmətli məclisimizin hazırki tərkibi cəmiyyətin əhval-ruhiyyəsinə tam cavab vermir. 2012-ci ildə cəmiyyət xeyli dəyişib, yeni yaşayış tərzi isə o deməkdir ki, xalqın iradəsinə etinasızlıq göstərmək olmaz”.

Donbassla dialoq

“Əziz qardaşlarım və bacılarım, həmvətənlərim, əksəriyyətiniz artıq soyğunçuluq və rişxəndlərlə regionun onsuz da böhran vəziyyətində olan iqtisadiyyatını faciə həddinə çatdırmış terrorçuların idarəetməsinin “ləzzətini” dadmısınız. Amma biz heç bir halda sizi fəlakətdə buraxmayacağıq. Baxmayaraq ki, Ukrayna xalqının verdiyi böyük qurbanlar göz önündədir. Mən sülh istəyirəm və Ukraynanın birliyinə nail olacağam. Əlinə qanunsuz silah alan ondan qurtulmağa çağırıram. Bunun müqabilində birincisi, əlində Ukrayna hərbiçilərinin və dinc əhalisinin qanı olmayanların və terrorizmin maliyyələşdirilməsində əli olmayanların cinayət məsuliyyətindən azad edilməsinə zəmanət verirəm. İkincisi, evlərinə qayıtmaq istəyən rus muzdlularına azad dəhliz. Üçüncüsü, sülh dialoqu. Aydındır ki, nişançılar, riyakarlar və digər alçaqlarla deyil. Söhbət dinc vətəndaşlarla dialoqdan gedir".

Ukraynanın birliyi

“Mən Ukraynanın birliyini qoruyub saxlamaq və möhkəmləndirmək, uzunmüddətli sülhü təmin etmək və etibarlı təhlükəsizliyə zəmanət vermək üçün prezident oluram. Sülh Ukrayna xalqının bu gün can atdığı əsas şeydir. Məhz Avropa təcrübəsi göstərir ki, səlahiyyətlərin böyük hissəsini artıq mərkəzdən yerli hakimiyyət orqanlarına ötürmək lazımdır. Mərkəzdən səlahiyyətlərin paylanması üzrə islahat bu il Konstitusiyaya dəyişikliklərlə başlayacaq. Yeni seçilən yerli şuralara yeni səlahiyyətlər veriəcək, amma Ukrayna unitar dövlətdir və belə də qalacaq. Federallaşma haqqında cəfəngiyyatın Ukrayna üçün zəmini yoxdur”.

Krım

“Rusiya Krımı işğal edib, lakin Krım Ukraynanındır və belə də qalacaq. Dünən Normandiyada Rusiya rəhbərliyinə bunu qətiyyətlə bildirdim”.