Prezident Trampla əvvəlki iş təcrübəmiz müsbət olub - İlham Əliyev

Fevralın 11-də Çinin CGTN (China Global Television Network) telekanalı Azərbaycan prezidenti İlham Əliyevin yanvarın 20-də Davosda verdiyi müsahibəni dərc edib.

Azərbaycanın dünya siyasətində rolu və yeri haqqında suala cavabda Əliyev deyib ki, "Azərbaycanın regional sabitliyə verdiyi töhfə" qlobal, beynəlxalq aktorlar tərəfindən  qiymətləndirirlir.

"Əgər hər bir ölkə diqqətini, sadəcə, öz gündəminə yönəltsə, başqa ölkənin işlərinə müdaxilə etməyə çalışmasa, münaqişələr, narazılıqlar, müharibələr olmaz. Bütün dünyada hələ də qeyri-sabit vəziyyətin olmasının və qan tökülməsinin yeganə səbəbi ondan ibarətdir ki, imperialist keçmişi olan ölkələr, sadəcə olaraq, müdaxilə etməyə, dominantlıq etməyə, diktə etməyə davam etmək istəyir və bu, təbii olaraq, müqavimətə gətirib çıxarır", deyə o bildirib.

Amerikanın yeni administrasiyası haqqında suala cavabda Əliyev qeyd edib ki, Trampın ilk prezidentliyi dövründə "son 4 ildə Bayden administrasiyasının Azərbaycana ədalətsiz yanaşması səbəbindən əlaqələrimizin tamamilə korlanmasından fərqli olaraq, bizim əlaqələrimiz çox uğurla inkişaf edirdi".

"Prezident Trampla birgə işləməklə bağlı əvvəlki təcrübəmiz çox müsbət idi. Biz gözləyirik ki, ABŞ-Azərbaycan münasibətlərində itirilmiş illər hesab etdiyimiz bu 4 il artıq tarixə qovuşacaq və biz yenidən başlayacağıq", deyə o qeyd edib.

Əliyevin fikrincə, bəzi Qərb liderləri "prezident Trampa qarşı çox ədalətsiz idilər və sözsüz ki, onlar narahatdırlar".

Əliyev həmçinin hesab edir ki, ABŞ-da dəyişikliklərlə bağlı narahatlıq üçün ciddi səbəblər görmür. "Düşünürəm ki, dünya daha təhlükəsiz ola bilər", deyə o qeyd edib.