Prezidentliyə namizədlərin seçkiqabağı təşviqat kampaniyası başlayıb

Bakı/19.03.18/Turan: Martın 19-dan Azərbaycanda növbədənkənar prezident seçkiləri ilə bağlı namizədlərin seçkiqabağı təşviqat kampaniyası başlayıb. Prezident seçkiləri aprelin 11-də olacaq.

Təşviqat səsvermənin başlanmasına bir sutka qalmış - aprelin 10-da başa çatacaq.

Ümumilikdə, prezidentliyə namizədlərə pulsuz əsaslarla seçkiqabağı təşviqat üçün İctimai televiziya və radioda həftəlik 3 saat vaxt ayrılacaq.

Onlar həmçinin "Azərbaycan", "Xalq" və "Bakinskiy raboçiy" qəzetlərinin səhiflərində pulsuz təşviqat apara biləcəklər.

17 informasiya agentliyi və on-layn nəşr, 8 qəzet, 4 telekanal - İctimai Televiziya, Xəzər, ATV və ARB pullu əsaslarla təşviqat materiallarını yayımlamağa hazır olduqlarını bildiriblər.

Telekanallar qiymət müəyyən ediblər: praym-taymda 1 dəqiqəlik efir vaxtı namizədə 3-6 min manata başa gələcək.

Bundan əlavə, namizədlər açıq meydançalarda və zallarda seçicilərlə görüşlər keçirə bilər. Bundan ötrü 75 şəhər və rayonda yerlər ayrılıb.

8 nəfərin prezidentliyə namizədliyi qeydə alınıb: prezident İlham Əliyev, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Sosial Demokrat Partiyasının lideri Araz Əlizadə, Milli Dirçəliş Hərəkatı Partiyasının təmsilçisi Fərəc Quliyev, "Cəbhəçilərin təşəbbüs qrupu"nun (AXCP-yə aidiyyatı yoxdur) nümayəndəsi Razi Nurullayev, Müasir Müsavat Partiyasından Hafiz Hacıyev, bitərəf, parlamentin deputatı Zahid Oruc, Azərbaycan Demokrat Partiyasının sədri Sərdar Cəlaloğlu.

Aparıcı müxalifət partiyaları seçkiləri boykot edirlər.-06B--