Prokuror bloger R.Ramazanovun 10 il azadlıqdan məhrum edilməsini istəyib

Çərşənbə günü Ağır Cinayətlərə dair İşlər üzrə Bakı Məhkəməsində bloger Rəşad Ramazanovun işi üzrə prosesdə prokuror onun 10 il azadlıqdan məhrum edilməsini istəyib.

Müdafiə tərəfin yekun çıxışı noyabrın 13-nə təyin edilib.

Ramazanov CM-in 234.4.3-cü maddəsi (böyük ölçüdə narkotik vasitələrin qanunsuz saxlanması və satışı) ilə ittiham olunur. Bu maddə üzrə maksimum cəza tədbiri 12 il azadlıqdan məhrumetmədir.

O, mayın 9-da metronun “20 Yanvar” stansiyası yaxınlığında saxlanılıb. Polisin iddiasına görə, Ramazanovun üzərindən 9 qr heroin tapılıb. Lakin Ramazanov özü ittihamı təkzib edərək, narkotik maddənin siyasi motivlərlə onun üzərinə qoyulduğunu bəyan edib. Bloger facebook-da Azərbaycan hakimiyyətini kəskin tənqid etməsi ilə məşhurdur.

Ramazanov öz facebook səhifəsində (Rashad Heqiqet Ağaaddin) din, azadlıq, ədalət mövzularında məqalələr, statuslar yazırdı.

Xüsusən, o, İlham Əliyevin üçüncü dəfə prezidentliyə namizədliyinin irəli sürülməsi ilə bağlı istehza edərək, onun görünür, Ginnesin rekordlar kitabına daxil olmaq istədiyini qeyd edirdi.

O, Azərbaycan hakimiyyətini “şeytan Əliyevlər rejimi” adlandırır.

Maraqlıdır ki, həbsindən sonra 10 gün ərzində o, qanuna zidd olaraq DİN-in MCMBİ-də saxlanılırdı və yalnız hüquq müdafiəçilərinin və mətbuatın müdaxiləsindən sonra Penitensiar Xidmətin istintaq təcridxanasına köçürüldü. -16B06-