Prokuror İntiqam Əliyevi 10 il müddətinə azadlıqdan məhrum etməyi təklif edib

Aprelin 14-də hüquq müdafiəçisi İntiqam Əliyevin işi üzrə məhkəmədə dövlət ittihamçısı çıxış edib.

Prokuror Fərid Nağıyev Əliyevi cəzasını ümumi rejimli cəzaçəkmə müəssisəsində çəkməklə 10 il müddətinə azadlıqdan məhrum etməyi təklif edib.

O, həmçinin məhkəmədən Əliyevin cəzasını çəkdikdən sonra üç il ərzində dövlət və bələdiyyə orqanlarında vəzifə tutmaq hüququndan məhrum edilməsini istəyib.

Əliyev özü prokurorun çıxışından əvvəl verdiyi ifadəsində bildirib ki, bütün ittihamlar uydurmadır və cinayət işi saxtalaşdırılıb. O qeyd edib ki, QHT-lərə qarşı cinayət işləri siyasi motivlərlə, vətəndaş cəmiyyətini susdurmaq və ölkədə qorxu mühiti yaratmaq məqsədilə saxtalaşdırılıb.

Müdafiə tərəfin yekun çıxışları aprelin 21-nə təyin edilib.

** İntiqam Əliyev 2014-cü il avqustun 8-də qanunsuz sahibkarlıq, vergi ödənişindən yayınma, vəzifə səlahiyyətlərindən sui-istifadə ittihamları ilə həbs edilib. Sonradan o, həmçinin mənimsə və vəzifə saxtakarlığında ittiham olunub. Amnesty İnternational onu “vicdan məhbusu” kimi tanıyıb. -06C-