Prokurorluq: Mehman Hüseynov cinayət xarakterli məlumatların araşdırılması üçün dəvət edilib YENİLƏNİB (YENİLƏNİB)

2013 Oktyab 02 (Çərşənbə) 15:23:14

Sosial şəbəkələrdə yayılmış cinayət xarakterli məlumatların araşdırılması məqsədi ilə Reportyorların Azadlıq və Təhlükəsizlik İnistutunun əməkdaşı Mehman Hüseynov izahatının alınması üçün Baş Prokurorluğa dəvət edilib. Bu barədə Respublika Prokuroroluğunun mətbuat xidmətinin məlumatında deyilir. 

Mətbuat xidmətinin məlumatına görə, hazırda müvafiq araşdırmalar davam etdirilir.

Fotoreportyor, bloger Mehman Hüseynov bu gün səhər 3 nəfər mülki  geyimli şəxs tərəfindən tutularaq Respublika Prokurorluğuna aparılıb. Hazırda ondan izahat alınır. Vəkil dindirməyə buraxılmayıb. 

Vəkilin sözlərinə görə, bloger sosial şəbəkələrdə yaydığı “300 spartalı” video rolikinə görə saxlanıb. -03-

2013 Oktyab 02 (Çərşənbə) 13:37:14

Vəkil Elçin Sadıqovun order və vəkalətnaməsinin olmasına baxmayaraq,  fotoreportyor Mehman Hüseynovun dindirildiyi yerə - Baş Prokurorluğa buraxılmır.

Vəkilin sözlərinə görə, M.Hüseynov prezident seçkilərinə həsr olunmuş “300 spartalı” satirik videoçarx ilə əlaqədar saxlanılıb.

Videoçarxın mahiyyəti ondan ibarətdir ki, filmin qəhrəmanları prezidentliyə namizədlərin teledebatlar zamanı işlətdikləri frazalarla danışırlar. –16/06D-

2013 Oktyab 02 (Çərşənbə) 11:53:07

 Reportyorların Azadlıq və Təhlükəsizlik İnstitutunun fotoreportyoru Mehman Hüseynov səhər saatlarında  öz təşkilatının yaxınlığında saxlanılıb və naməlum  şəxslər onu Toyota Prado avtomobilində aparıblar.

“Onu naməlum adam söhbətə dəvət edib. Mehman danışmaq üçün həyətə çıxıb. Ona ikinci adam yaxınlaşıb. Mehmanı  maşına əyləşdirib aparıblar. Həmkarları yalnız maşının nömrəsini görə biliblər “060””, - RATİ-nin əməkdaşı Turan-a bildirib.

Vəkil Elçin Sadıqov Turan-a bildirib ki, Mehmanı Baş Prokurorluğun binasına aparıblar. Bunun hansı məqsədlə edildiyi hələlik məlum deyil.

Sentyabrda Mehman Milli Təhlükəsizlik Nazirliyinin Səbayel şöbəsinə dəvət olunub. RATİ-dən bildirilib. 

2012-ci ilin iyununda ona qarşı xuliqanlıq ittihamı ilə cinayət işi qaldırılıb. Bu ittiham üzrə onu  beş ilədək azadlıqdan məhrumetmə cəzası gözləyə bilər. İttiham indiyədək aradan qaldırılmayıb.  

Mayda M.Hüseynov NİDA hərəkatı fəallarının işi üzrə şahid qismində keçib, həmçinin “Harlem Shake” aksiyasının videoçəkilişi ilə bağlı suallara cavab verib. 

“Mən hər gün həbs olunacağımı gözləyirəm, hətta mənə rəsmi xəbərdarlıq da ediblər”, - o zaman M.Hüseynov Turan-a bildirmişdi. 

İstintaq altında olan şəxs kimi M.Hüseynov bu ilin yanvarında AŞPA-nın hüquqi məsələlər və İnsan Hüquqları Komitəsinin iclasında siyasi məhbuslar siyahısına daxil edilib. İclasda Azərbaycanda siyasi məhbuslarla bağlı Ştrasserin məruzəsinə düzəlişlər müzakirə olunub və qəbul edilib.

Bu ilin iyununda M.Hüseynov və RATİ-nin digər əməkdaşı Rasim Əliyev peşə fəaliyyəti zamanı polisin fiziki təzyiqlərinə məruz qalıblar. Nəticədə polislər cəzalandırılıb.  

Bu il M.Hüseynov Gerd Butserius adına “Şərqi Avropada azad mətbuat” mükafatına layiq görülüb. O bu mükafata 2012-ci ildə Azərbaycanda korrupsiya və insan hüquqlarının pozulması problemlərinin araşdırılmasına görə layiq görülüb. Lakin hakimiyyət onu mükafatın təqdim olunma mərasimində iştirak etmək üçün ölkədən buraxmayıb.0--