Putin-Əliyev-Sarkisyan üçtərəfli görüşü olmayacaq

Avqustun 9-da Soçudə Vladimir Putinin Azərbaycan prezidenti İlham Əliyev və Ermənistan prezidenti Serj Sarkisyanla ikitərəfli görüşləri keçiriləcək.

Bu barədə avqustun 8-də Rusiya prezidentinin saytı məlumat yayıb.

Əliyevlə görüşdə Rusiya-Azərbaycan əməkdaşlığının ən mühüm məsələlərinin müzakirəsi, gələcək qarşılıqlı səmərəli layihələrin, ilk növbədə energetika, investisiya və regionlararası kooperasiya sahəsində layihələrin irəli sürülməsi üzrə birgə addımların razılaşdırılması planlaşdırılır.

Sarkisyanla görüş zamanı iki ölkə arasında siyasi, ticarət-iqtisadi və humanitar qarşılıqlı əlaqələrin gələcək inkişafı haqqında fikir mübadiləsi aparılacaq. Əsas diqqət Ermənistanın Avrasiya İqtisadi İttifaqına qoşulması prosesinə yönələcək.

Məlumatda Qarabağ nizamlanması haqqında bir kəlimə belə deyilmir, baxmayaraq ki, bir müddət əvvəl görüşün üçtərəfli olacağı və əsas mövzunun Qarabağ olacağı planlaşdırılırdı.

Lakin rəsmi Bakı hələ də üçtərəfli görüşə hazır olduğunu təsdiq etməyib və göründüyü kimi, məhz İlham Əliyev Ermənistan prezidenti ilə danışmaq istəməyib.

Eyni zamanda, Putinin Əliyev və Sarkisyanla görüşdə Qarabağ münaqişəsinin müzakirə olunacağına şübhə yoxdur. Bu vəziyyətdə tərəflərin gərginliyin azalması istiqamətində təsirli addımlar atacağını gözləmək çətindir. -02D-