Putin Əliyevə zəng edib

Bakı/12.12.22/Turan:  Dekabrın 12-də Rusiya prezidenti Vladimir Putin prezident İlham Əliyevə zəng edərək onunla Bakı, Yerevan və Moskva arasında üçtərəfli sazişlərin reallaşmasını müzakirə edib. Bu barədə bazar ertəsi Kremlin mətbuat xidməti bildirib.

“Rusiya, Azərbaycan və Ermənistan liderləri arasında əldə olunmuş 2020-ci il 9 noyabr, 2021-ci il 11 yanvar və 26 noyabr və bu il 31 oktyabr tarixli razılaşmaların həyata keçirilməsinin bəzi praktiki aspektləri, o cümlədən Cənubi Qafqazda iqtisadi və logistika əlaqələrinin bərpası planları müzakirə olunub”, - məlumatda deyilir.

Rəsmi Bakı hələlik telefon danışığı və onun məzmunu barədə məlumat verməyib. Telefon zənginin Laçın dəhlizinin bugünkü bloklanması ilə bağlı olmasına şübhə yoxdur. İki liderin nə barədə razılığa gəldiyi Qarabağda vəziyyətin necə inkişaf etdiyindən məlum olacaq. 02D