"Putin imperiya ambisiyalarından əl çəkməyəcək": Blinken Parisdə Ukrayna, Yaxın Şərq və Qafqazı müzakirə edib

ABŞ və Fransanın baş diplomatları çərşənbə günü Parisdə Ukrayna, Yaxın Şərq və digər mühüm problemlər üzərində birgə işi davam etdirəcəklərini bildiriblər, bu barədə Turan-ın Asiya və Avropa turnesində Entoni Blinkeni müşayiət edən müxbiri məlumat verib.

Dövlət katibi Entoni Blinken və fransalı həmkarı Jan-Noel Barro Gürcüstandakı siyasi böhranı xüsusilə müzakirə ediblər.

"Fransa və ABŞ Gürcüstanda demookratiyadan geriləmə görür, bu, dərin narahatlıq doğurur", deyə Blinken birgə konfransda Turan-ın sualına cavabda bildirib.

"Və sadəcə demokratiyadan geriləmə deyil, gürcü xalqının böyük əksəriyyətinin Avropaya yaxın gələcək qurmaq istəyindən uzaqlaşma". Buna görə ABŞ və tərəfdaşları Bidzina İvanişviliyə və "Gürcü Arzusu" hökumətinin digər üzvlərinə qarşı sanksiyalar tətbiq ediblər.

Ukraynaya gəlincə, "Ukraynanın güclü mövqeyə malik olmaq və öz müstəqilliyini müdafiə etmək üçün ehtiyacı olan hər şeyə malik olmasını təmin etmək" üçün yaxın aylarda Fransanın liderliyi həlledici əhəmiyyət kəsb edəcək.

Putin imperiya ambisiyalarından əl çəkməyib və çəkməyəcək. Və atəşkəs olsa, o, bu vaxtdan dincəlmək, yenidən təchizat və son nəticədə yeni hücum üçün istifadə edəcək", deyə Blinken Turan-ın suallarına cavabda bildirib.

Buna görə də Ukrayna və Rusiya arasında istənilən sülh sazişi gələcək təcavüzə qarşı "real çəkindirmə" ehtiva etməlidir: "... Bu, demarkasiya prosesində və ya atəşkəs xəttində başqa ölkələrin patrul çəkməsindən ibarət ola bilər", deyə Blinken qeyd edib.

Öz növbəsində, Fransanın xarici işlər naziri Barro da qeyd edib ki, "Vladimir Putinin imperialist baxışlarından söhbət getdikdə dünya laqeydlik göstərməməli və sadəlövh olmamalıdır".

"Bu cəhətdən Toni Blinkenlə razıyam. 2022-ci ilin fevralında Putin Rusiyasının tammiqyaslı hücuma başlaya və münaqişələri Asiyaya ixrac edə, Şimali Koreyanı da buna cəlb edə biləcəyini gördük. Hətta Aİ üzvlərinə hücumlar da daxil olmaqla, münaqişə hibridləşib", deyə o bildirib.

"Bizim prioritetimiz Ukraynanı dəstəkləmək və onun danışıqlara güclü mövqedə daxil olmasına kömək etmək, həmçinin müharibənin Avropa qitəsinə qayıtmayacağından əmin olmaqdır. Bu, o deməkdir ki, bütün avropalılar Rusiyanın Qərbə doğru irəliləyən təhlükəsinin qarşısını almaq üçün səyləri fəallaşdırmalıdır", deyə Barro bildirib. 

Diplomatlar həmçinin prezident Trampın Ağ Evə qayıtması ilə bağlı yaranmış bəzi problemlərə toxunublar, "Amerikanın Qrenlandiyanı ələ keçirməsinin" qeyri-real ideya olduğunu bildiriblər.