Putin Rusiya hökumətini Bakıya gətirib (yenillənib)

Rusiya prezidenti Vladimir Putinin Azərbaycana dövlət səfəri ikitərəfli münasibətlər üçün müstəsna əhəmiyyət daşıyır. Bu barədə Azərbaycan prezidenti İlham Əliyev görüş zamanı bildirib.

"Bu gün biz artıq  sizinlə fikir mübadiləsi apardıq və ölkələrimiz arasında münasibətlərin – dostlarımız, qonşularımız və müttəfiqlərimiz arasındakı münasibətlərin necə inkişaf etməsindən məmnun olduğumuzu bildirdik. Biz bütün istiqamətlərdə müsbət dinamika görürük.

Bizim nümayəndə heyətlərinin tərkibi də özü-özlüyündə çox illüstrativdir. Yəni, müzakirə və qarşılıqlı fəaliyyət üçün həqiqətən çox mövzular var və bizim qarşılıqlı fəaliyyət sahəmiz ildən-ilə genişlənir. Biz bütün istiqamətlər üzrə qarşılıqlı fəaliyyətimizi gücləndirmək əzmindəyik və əminəm ki, sizin səfəriniz ölkələrimizin və xalqlarımızın yaxınlaşması işində növbəti mühüm addım olacaq", -  Əliyev qeyd edib.

Öz növbəsində, Vladimir Putin deyib ki, nümayəndə heyətlərinin üzvləri artıq qeyri-dormal şəraitdə məhsuldar ünsiyyət qura biliblər.

“Bizim hər iki tərəfdən görkəmli nümayəndə heyətimiz var. Demək olar ki, Rusiya Federasiyası hökuməti tam tərkibdə buradadır.  Belə geniş tərkibdə işləmək yaxın perspektiv və gələcək üçün addımlar atmağa imkan verir”, - Putin deyib.

"Biz  məhdud tərkibdə tamamilə prioritet xarakterli bir sıra məsələləri nəzərdən keçirə bildik, həmkarlarımız isə dünən axşam, eləcə də sizinlə qeyri- formal şəraitdə və bu gün ərzində bir-birilə təmasda olmaq və yaxın gələcək üçün addımlar atmaq imkanı əldə etdilər", - Rusiya prezidenti qeyd edib.

Günün ikinci yarısında Bakıda Rusiya və Azərbaycan prezidentləri Vladimir Putin ilə İlham Əliyevin geniş tərkibdə danışıqları başlayıb. Bundan əvvəl onlar bir saat yarım təkbətək danışıqlar aparıblar.

Danışıqlar zamanı Rusiya nümayəndə heyətinin tərkibinə aşağıdakılar daxil olub: xarici işlər naziri Sergey Lavrov, baş nazirin müavinləri Aleksandr Novak və Aleksey Overçuk, Prezident Administrasiyası rəhbərinin müavini Maksim Oreşkin, prezidentin köməkçiləri Yuri Uşakov və Ruslan Edelgeriyev, səhiyyə naziri Mixail Muraşko, iqtisadi inkişaf naziri Maksim Reşetnikov, nəqliyyat naziri Roman Starovoyt, prezidentin müşaviri İqor Levitin, hərbi-texniki əməkdaşlıq üzrə Federal Xidmətin direktoru Dmitri Şuqayev, “Rospotrebnadzor”ub rəhbəri Anna Popova, “Rosselxoznadzor”un rəhbəri Sergey Dankvert, “Rostrud”un rəhbəri Mixail İvankov, Birbaşa İnvestisiyalar Fondunun baş direktoru Kiril Dmitriyev, VTB Bankın prezidenti Andrey Kostin, "Qazprom"un rəhbəri Aleksey Miller, "Rosneft"in rəhbəri İqor Seçin, “Vneşekonombank”ın rəhbəri İqor Şuvalov.

Danışıqlarda Azərbaycan tərəfdən baş nazirin müavinləri, eləcə də müvafiq nazirliklərin və idarələrin rəhbərləri iştirak edirlər.