Putin: Rusiya və Türkiyə beynəlxalq arenada kifayət qədər uğurla əməkdaşlıq edir

Bakı/29.09.21/Turan: Rusiya və Türkiyə beynəlxalq arenada kifayət qədər uğurla əməkdaşlıq edir, bu barədə Rusiya prezidenti Vladimir Putin çərşənbə günü Soçidə Türkiyə prezidenti Recep Tayyip Erdoğanla görüşündə bildirib. Xəbəri Anadolu agentliyi yayıb.

“Beynəlxalq arenada (Türkiyə ilə) əməkdaşlığımız kifayət qədər uğurla davam edir. Burada həm Suriyanı, həm də Liviya ilə bağlı mövqelərimizin razılaşdırılması üzrə əlaqələrimizi nəzərdə tuturam”, deyə Rusiya lideri bildirib.

Putin Cənubi Qafqazda vəziyyətə diqqət çəkib.

Putinin sözlərinə görə, (Azərbaycana məxsus Ağdamda) atəşkəsə nəzarət üzrə Rusiya-Türkiyə Mərkəzi aktiv olaraq fəaliyyət göstərir. Bu əməkdaşlıq sabitliyin və barışıq addımlarının ciddi zəmanətidir”, deyə Rusiya lideri qeyd edib.

Putin Rusiya və Türkiyə arasında iqtisadi münasibətlərə də diqqət çəkib. Onun sözlərinə görə, Rusiya və Türkiyə koronavirus pandemiyası ilə əlaqədar ticarət dövriyyəsində yaranan itkiləri nəinki bərpa edib, hətta ticarət dövriyyəsi həcmini artırıb.

Dövlət başçısı qeyd edib ki, 2021-ci ilin 9 ayının yekunlarına görə RF və Türkiyə arasında ticarət dövriyyəsinin həcmi 50 faiz artıb. “Türkiyənin RF-yə investisiya həcmi 1,5 milyard dollar təşkil edir, Rusiyanın Türkiyə iqtisdiyyatına investisiyaları isə 6,5 milyard dollara çatıb. Bütün layihələr planlaşdırıldığı kimi davam edir”, deyə Putin bildirib.

Rusiya prezidenti qeyd edib ki, RF və Türkiyə idarələri hər iki ölkə üçün sərfəli olan güzəştlər əldə etməyi öyrəniblər, baxmayaraq ki, bəzən danışıqlar asan olmur.

Rusiya lideri Türkiyə dövlət başçısına “Türk axını”nın tikintisi ilə bağlı mövqeyinə görə təşəkkürünü bildirib.

Erdoğan Türkiyə-Rusiya əlaqələrinin davam etdirilməsinin və möhkəmlənməsinin böyük fayda gətirəcəyindən əminliyini ifadə edib.

O, birgə iqtisadi layihələrin uğurla həyata keçirildiyinə, həmçinin iki ölkənin beynəlxaq müstəvidə qarşılıqlı fəaliyyətinə diqqət çəkib.

Onun sözlərinə görə, Ankara və Moskvanın birgə addımları Suriya üçün də böyük əhəmiyyət kəsb edir. “Suriyada sülh Türkiyə-Rusiya əlaqələrindən asılıdır”, deyə Türkiyə prezidenti qeyd edib.

Türkiyə lideri həmçinin Ankara və Moskva arasında müdafiə sahəsində əlaqələrə toxunub.

Türkiyə prezidenti bu yaxınlarda BMT Baş Assambleyasında iştirak üçün Nyu Yorka səfəri zamanı Türkiyə qarşısında bir sıra məsələlər qaldırıldığını deyib. “Biz rəqiblərimizə lazımi cavabları verdik – onların diqqətinə çatdırdıq ki, qəbul etdiyimiz qərarlardan geri dönmək niyyətində deyilik”, deyə Türkiyə lideri bildirib.

Daha sonra Erdoğan qeyd edib ki, “Akkuyu” AES-in Türkiyənin cənubunda yerləşən Mersin əyalətindəki ilk enerji bloku 2022-ci ildə açıla bilər.

“Fəal işlər davam etdirilir. Türkiyədə birinci AES-in inşaatında 13 min nəfər işləyir, onların 10 min nəfəri Türkiyə vətəndaşıdır. Onların, demək olar ki, hamısı Rusiya ali məktəblərində təhsil alıb. Bu da əlaqələrimizin möhkəmlənməsinə töhfə verir”, deyə o bildirib.

Türkiyə prezidenti Rusiyaya meşə yanğınlarına qarşı mübarizəyə verdiyi töhfəyə görə təşəkkür edib, həmçinin Suriya məsələsinə toxunub, deyə Anadolu agentliyi qeyd edir. -0-